Մարզահամերգային համալիրի ներկայացուցիչները շարունակում են պնդել, որ իրենց նկատմամբ կատարվողը, այսինքն՝ շենքի խլման գործընթացը պարզապես սովորական թալան է, որը չունի որևէ իրավական հիմնավորում: Իսկ Դատական ակտերի հարկադիր կատարման ծառայությունը իր անօրինական գործողություններով լրացնում է այդ անօրինականությունների շարքը:
Համալիրի ներկայացուցիչ Կորյուն Գրիգորյանն այսօր լրագրողների հետ հանդիպմանը նշեց, որ ԴԱՀԿ երեկվա գործողությունների շնորհիվ, երբ կնքվել են հաստատության դռները, ներսում են մնացել հսկայական քանակությամբ իրեր, որոնք համալիրին չեն պատկանում, անձնական են կամ պատկանում են բոլորովին այլ ընկերությունների, և այդ անձինք այժմ չեն կարողանում հետ ստանալ իրենց գույքը:
Բացի այդ, Գրիգորյանը նշեց, որ շենքը չի գտնվում ՊՆ-ի հաշվեկշռում, ինչպես փորձ էր արվում ներկայացնել նախկինում: Շենքը, ըստ բանախոսի, ֆինանսների նախարարության հաշվեկշռում է: Միևնույն ժամանակ նա նշեց, որ վերջին շրջանում ՊՆ-ն երկու միջոցառում է անցկացրել համալիրում և մինչ օրս չի վճարել այդ միջոցառումների արդյունքում համալիրին հատկացվելիք 60 միլիոն դրամ պարտքը:
Կորյուն Գրիգորյանը հերթական անգամ ընդգծեց, որ պետբյուջեում 2 տարի շարունակ չի արտացոլվել իրենց վարկը, ինչը նշանակում է, որ այստեղ հանցակազմի տարրեր կան: «Սա Տիգրան Սարգսյանի և Դավիթ Սարգսյանի կողմից շատ հանգիստ արված գործարք էր, որի արդյունքում այդ գումարը յուրացվեց, և ոչ ոք չի ուզում պարզել, թե ուր ա հիմա էդ գումարը»,- նկատեց Գրիգորյանը: