«Արմենիա» հանրապետական հիվանդանոցի նախկին բուժքույր Նինել Իվանյանը, որը տարիներ շարունակ կառավարության մոտ «Արմենիա» բժշկական կենտրոնի տնօրինությունից պահանջում է բարոյական և նյութական վնասի փոխհատուցում ու իր աշխատանքային գրքույկը և նշում է, որ իրեն աշխատանքից ազատել են ապօրինաբար, այսօր կառավարության շենքի մոտ հայտարարեց, որ եթե վարչապետ Հովիկ Աբրահամյանը շարունակի արհամարհել իրեն, ինքը ինքնահրկիզում կանի:
Նինել Իվանյանը պատմեց, որ 1997 թվականից մինչև 2005 թվականը աշխատել է հիվանդանոցում որպես բուժքույր, ապա շարունակեց, որ աշխատանքի ընթացքում ամեն ինչ կատարել է պատշաճորեն, բայց երբ հետաքրքրվել է, թե ինչու են իրեն վճարում 15.000 դրամ, մյուսներին՝ 25.000, նրան աշխատանքից ազատել են:
«Եթե Հովիկ Աբրահամյանը շարունակի չընդունել ինձ, կինքնահրկիզվեմ, այ, էդ ժամանակ խելքները կգան գլուխները, որ լրիվ խայտառակվեն, նոր կիմանան, որը որից հետո է: Ինչքա՞ն ասես մարդավարի. հասկացնում ես, դեբիլի նման չեն հասկանում, ոչինչ, ես կհասկացնեմ: Որոշել եմ երկուշաբթի օրը գնամ նախագահականի վերահսկողության ծառայության պետի մոտ»,- ասաց նա «Առաջին լրատվական»-ի հետ զրույցում:
Նա պատմեց, որ հիմա ստուգող հանձնաժողով են ուղարկել հիվանդանոց. «Կամիսիա է ուղարկում, կառնի, ոչխարների աշխատավարձը կպահի, իսկ ես չեմ լռելու, մինչև ինձ հասցրած բարոյական, նյութական վնասները չփոխհատուցի 2005-ի հուլիսի 11-ից առ այսօր, և եթե չուղղի իմ աշխատանքային գրքույկը, ես իրեն հանգիստ չեմ տա»,- ասաց Նինել Իվանյանը:
Նա պատմեց, որ այսօր իրեն է մոտեցել արդարադատության նախարար Հովհաննես Մանուկյանը և ասել. «Չե՞ք ամաչում, որ խաբում եք: Ցինիկաբար խնդալով գնում ա: Ինչի՞: Պատասխանում են՝ իրենց շրջանակից դուրս ա, իսկ իրենց շրջանակների մեջ ի՞նչն է մտնում՝ պոտենցիալ հանցագործների բռնարարքները պարտակե՞լը»:
Ավելին՝ տեսանյութում:
