Երեքշաբթի օրն ԱՄՆ-ը պատժամիջոցներ է սահմանել «Ռոսսելխոզբանկի», ՎՏԲ-ի և նրան ենթակա Մոսկվայի բանկի նկատմամբ: Այս մասին գրում է Financial Times-ը:
ԱՄՆ քաղաքացիներին կամ ԱՄՆ տարածքում գտնվող անձանց արգելվում է այս 3 ռուսական բանկերին նոր բաժնետիրական կամ պարտքային կապիտալ տրամադրել 90 օրից ավել ժամանակով, գործարքներ և այլ գործողություններ անել նրանց նոր բաժնետոմսերով և պարտքային գործիքներով: Պատժամիջոցները չեն վերաբերում այդ բանկերի կամ այլ հաստատությունների հետ այլ գործարքների, որոնցում նրանք բաժին ունեն:
Ըստ պարբերականի՝ պատժամիջոցներն ամենից շատ սպառնում են ՎՏԲ-ին, քանի որ այն զգալիորեն ամրապնդվել է 2008-ի ֆինանսական ճգնաժամից հետո:
ՎՏԲ-ն նաև օտարերկրյա ներդրողների զգալի բազաներ ունի, 3 սուվերեն հիմնադրամ որպես հիմնական բաժնետեր՝ նորվեգական İnvestment Management-ը, կատարական Qatar İnvestment Authority-ն և Ադրբեջանի պետական նավթային հիմնադրամը:
Այդ հիմնադրամներն անցած տարի 3,3 մլրդ դոլարով գնել են ՎՏԲ-ի բաժնետոմսերը, և նրանցից յուրաքանչյուրն ունի 3-3,75% (Ադրբեջանի պետական նավթային հիմնադրամը ՎՏԲ-ում ներդրել է կես մլրդ դոլար): Միևնույն ժամանակ, պետությունը վերահսկում է այդ բանկի բաժնետոմսերի 60%-ը:
Միաժամանակ, պարբերականը նշում է, որ ՎՏԲ-ի նկատմամբ պատժամիջոցներն ուժգին կհարվածեն Ադրբեջանի պետական նավթային հիմնադրամի շահերին:
