Հայաստանում ԱՄՆ դեսպանատունը ՀՀ կառավարությանը և բիզնես կառույցներին տեղեկացրել է ռուսական ընկերությունների և ֆիզիկական անձանց հետ համագործակցելու դեպքում վտանգների մասին, գրում է IA REGNUM-ը` վկայակոչելով Երևանում ԱՄՆ դեսպանատան մամլո ծառայությանը:
«Մենք կոչ ենք անում բոլոր պետություններին և նրանց նախագահներին՝ հաշվի առնել այն վտանգը, որը կառաջանա (ռուսական) ընկերությունների և ֆիզիկական անձանց հետ համագործակցելիս, ինչպես նաև դադարեցնել մեր և մյուսների կողմից ընդունված պատժամիջոցներին հակասող գործարքները: Ինչպես աշխարհի մյուս երկրներում գործող ԱՄՆ դեսպանատները, այնպես էլ Երևանում ամերիկյան դեսպանատունը Հայաստանի կառավարության ներկայացուցիչներին և ընկերություններին է փոխանցել վերջին պատժամիջոցների մասին տեղեկությունները»,-ասվում է հաղորդագրությունում:
Հաղորդագրությունում նաև նշվում է, որ հուլիսի 16-ին ԱՄՆ-ը «Ղրիմի բռնակցման, Ուկրաինայում Ռուսաստանի ռազմական միջամտության և Ուկրաինայի ինքնիշխանության նկատմամբ շարունակվող ոտնձգությունների պատճառով» պատժամիջոցներ է սահմանել ընդդեմ 8 ռուսական ռազմաարդյունաբերական ընկերությունների, երկու ֆինանսական կառույցների, երկու էներգետիկ ընկերությունների, մի խումբ ռուս պաշտոնատար անձանց և «ուկրաինացի անջատողականների» («Գազպրոմբանկ», ՎԷԲ, «Նովատեկ», «Ռոսնևտ», ՎՏԲ բանկ, Ռոսսելխոզբանկ):
«Այդ քայլերի իրականացումից հետո Միացյալ Նահանգները մի շարք հանդիպումներ է իրականացրել` սերտորեն դրանք կոորդինացնելով մեր շատ գործընկերների հետ, այդ թվում` ԵՄ-ից և «յոթնյակ»-ից, որոնք ևս մատնանշել են Ուկրաինայի արևելքում ստեղծված դրության համար պատասխանատու անձանց»,- ընդգծվում է հաղորդագրությունում:
Նշենք, որ ՎՏԲ բանկը և «Գազպրոմբանկ»-ի դուստր ընկերություն «Առէքսիմբանկ»-ը ներկայացված են Հայաստանի ֆինանսական շուկայում: Բացի այդ, նախատեսվում է, որ «Ռոսնևտ» ընկերությունը մոտ 400 մլն դոլար կներդնի հայկական «Նաիրիտ» քիմիական գործարանի վերագործարկման համար։