Ցանկալի է, որ հայկական լոբբին ԱՄՆ-ում ավելի զորավոր լինի: Հայ Ավետարանչական կենտրոնի նախաձեռնությամբ կազմակերպված հանդիպման ժամանակ այս մասին ասաց «Բոսթոն Գլուբ» (The Boston Globe) թերթի ամերիկահայ լրագրող և Բոսթոնի համալսարանի (University of Boston) լրագրության դասախոս Ջուլիետ Փենինգթոնը՝ անդրադառնալով ամերիկյան մամուլում Հայոց ցեղասպանության լուսաբանմանն ու ԱՄՆ-ում ազատ խոսքի իրավունքի իրագործմանը:
Նա նշեց, որ թուրքական գործող լոբբին ԱՄՆ-ում շատ հզոր է: Ըստ նրա՝ որոշ ամերիկյան ԶԼՄ-ներ փորձում են շրջանցել Եղեռնի թեման և, բնականաբար, ներկայացնել այն այլ կերպ, այսինքն՝ մեկուկես միլիոնի հայերի կոտորածը ներկայացնել որպես Առաջին համաշխարհային պատերազմի հետևանք և ոչ թե Մեծ Եղեռն ու Ցեղասպանություն: «Կան փաստացի տեղեկություններ, որ Ցեղասպանությունը տեղի է ունեցել, բայց խնդիրն այն է, որ շատերը դա փորձում են այլ կերպ ներկայացնել, ներկայացնել այնպես, որ կարծես դա եղել է ամբողջ պատմության բաղկացուցիչ մասը և ոչ թե առանձին եղեռնագործություն: Անշուշտ, թուրքական լոբբին մեծ ազդեցությամբ ներդրում է իրականացնում մեղմացնելու և շրջանցելու համար Ցեղասպանության թեման, որի մասին պետք է խոսվի, և որի 100-ամյա տարելիցը պետք է նշվի հաջորդ տարի: Այսինքն՝ նրանք իրենց լոբբին իրականացնում են՝ այցելելով համալսարաններ, ԶԼՄ-ներ, համոզելով նյութերը ներկայացնել ոչ թե որպես Ցեղասպանություն կամ Ցեղասպանությունը բառը կիրառելով, այլ պարզապես որպես Համաշխարհային պատերազմի բաղկացուցիչ մաս:
Զուգահեռ գործում է նաև հայկական լոբբին: Անշուշտ, այս ուղղությամբ երկու կողմն էլ հետաքրքրված են: Եվ թուրքական, և հայկական լոբբին ունեն հզոր գործիչներ: Դժբախտաբար, ԱՄՆ-ն Թուրքիայի կարիքն ունի, լինի նավթը, օդային տարածությունը, և, դժբախտաբար, եթե մենք փորձում ենք խոսել Ցեղասպանության մասին, այստեղ մեզ զգուշացվում է շատ չծավալվել»,- նշեց ամերիկահայ լրագրողը: Վերջինս ասաց, թե կցանականար, որ ԱՄՆ-ում հայկական լոբբին ավելի զորավոր լիներ, թեև այն գոյություն ունի: Չնայած, նրա խոսքերով, անկախ լոբբիից, գոյություն ունի աշխարհաքաղաքականությունը, որը հետևյալն է՝ ԱՄՆ-ն ունի կախվածություն Թուրքիայից:
Առաջարկում ենք մանրամասներին ծանոթանալ տեսանյութի միջոցով:
