2014 թվականի երկրորդ եռամսյակում Ուկրաինայի ՀՆԱ-ն ընկել է 4.7 տոկոսով՝ անցած տարվա նույն ժամանակահատվածի համեմատ: Առաջին եռամսյակում անկումը կազմել է 1.1 տոկոս՝ հայտնում է Ուկրաինայի վիճակագրության պետական ծառայությունը: Այս մասին փոխանցում է Korrespondent.net-ը:
2014-ի առաջին եռամսյակի համեմատությամբ՝ հաշվետու ժամանակահատվածում ՀՆԱ-ն, հաշվի առնելով նաև սեզոնային գործոնը, կրճատվել է 2.3 տոկոսով: Հաղորդագրությունում նշվում է, որ 2014-ի երկրորդ եռամսյակում Ուկրաինայի ՀՆԱ-ն, համեմատած 2013-ի երկրորդ եռամսյակի հետ, կազմել է 95.3 տոկոս, իսկ 2014-ի առաջին եռամսյակի հետ՝ հաշվի առնլով սեզոնային գործոնը, 97.7 տոկոս:
Ինչպես ավելի վաղ հաղորդվել էր, Ուկրաինայի ՀՆԱ-ն 2013-ի չորրորդ եռամսյակում աճել է 3.7 տոկոսով՝ մինչ այդ անկում գրանցելով 5 եռամսյակ անընդմեջ:
Նշենք, որ երկրի տնտեսական զարգացման և առևտրի նախարարությունը ՀՆԱ անկումը առաջին կիսամյակի արդյունքներով գնահատում է մոտ 3 տոկոս և կանխատեսում, որ այն 2014-ի արդյունքներով կարող է հասնել 6 տոկոսի: Իր հերթին, ԱՄՀ-ն 2014-ի արդյունքներով Ուկրաինայի ՀՆԱ-ի 6.5 տոկոսով անկում է կանխատեսել: