Արևմուտքի կողմից Ռուսաստանի դեմ պատժամիջոցների կիրառման բացասական հետևանքներն իր վրա կզգա ողջ տարածաշրջանը: Այս մասին լրագրողների հետ հանդիպմանը խոստովանել է ԱՄՀ ղեկավար Քրիստին Լագարդը՝ փոխանցում է ITAR-TASS-ը:
Մեկնաբանելով այդ թեման՝ նա հայտարարել է, որ այդ պատժամիջոցների ազդեցությունն առաջին հերթին կզգա Ռուսաստանը, որի դեմ դրանք ուղղված են: Փորձագետը հղում է արել վիճակագրությանը, որը վկայում է Ռուսաստանից կապիտալի արտահոսքի և դրա տնտեսությունում ուղիղ օտարերկրյա ներդրումների կրճատման մասին:
Անդրադառնալով Ուկրաինային՝ Արժույթի միջազգային հիմնադրամի ղեկավար Քրիստին Լագարդը հայտարարել է, որ կառույցն ընդհանուր առմամբ բավարարված է, թե ինչպես են Ուկրաինայի իշխանությունները կատարում իրենց հետ համաձայնեցված հակաճգնաժամային աջակցման ծրագիրը:
Լագարդը նշել է նաև, որ ԱՄՀ-ն ներկայում անհրաժեշտ չի համարում գործող ծրագրի շրջանակում Ուկրաինայի վարկային աջակցության ծավալի մեծացումը: