Microsoft ընկերությունը պատրաստվում է Windows Phone 8.1.-ի հիման վրա երկու նոր սմարթֆոն թողարկել: Դրանցից մեկը նախատեսված է սելֆիի սիրահարների համար, իսկ մյուսը՝ նրանց համար, ում «վինֆոն» է հարկավոր: Այս մասին է հաղորդում The Verge կայքը՝ հղում կատարելով Սթիվեն Էլոպի՝ Nokia-ի նախկին ղեկավարի և սարքավորումների գծով Microsoft-ի ստորաբաժանման ներկայիս ղեկավարի մտերիմներին:
Երկու մոդելների թեսթային օրինակներն էլ իբրև թե Էլոպը ցույց է տվել իր գործընկերներին: «Սելֆիի» համար նախատեսված սարքավորումը բարձր թողունակությամբ դիմային տեսախցիկ և 4,7-դյույմանոց դիսփլեյ կունենա: Այս սարքավորումը հայտնի է Superman կոդային անվանմամբ:
Մյուս մոդելը կոչվում է Tesla: Աղբյուրների խոսքերով՝ Էլոպը նկարագրել է այն որպես PureView տեսախցիկով «բարձր դասի մատչելի հեռախոս»:
Էլոպի հայտարարությունից հետո վերջնականապես պարզ է դարձել, որ նորույթներն ամենայն հավանականությամբ վաճառքի կհանվեն: