Վերաքննիչ քրեական դատարանում ավարտվեց Սերժիկ Դարչինյանի գործով բերված վերաքննիչ բողոքի քննությունը:
Գործը քննվել է Լոռու մարզի ընդհանուր իրավասության դատարանում Աղասի Մկոյանի նախագահությամբ:
61-ամյա Սերժիկ Դարչինյանը մեղավոր է ճանաչվել պոռնկությանը նպաստելու համար:
Այս հանցավոր արարքի կատարման համար Սերժիկ Դարչինյանն առաջին անգամը չի դատվում: Նույն արարքի համար նա 2012 թվականի նոյեմբերի 29-ին դատապարտվել է 3 տարի ազատազրկման, նրա նկատմամբ կիրառվել է պայմանական դատապարտություն, սահմանվել է 2 տարի փորձաշրջան:
Ըստ ներկա դատական ակտի՝ 2011 թվականի ապրիլին Սերժիկ Դարչինյանը վարձակալել է Վանաձոր քաղաքի բնակիչ Ռ. Գ.-ին պատկանող՝Լոռու մարզի Շահումյան համայնքի «Թեժ լեռ» տեղանքում գտնվող «Ագնի» ռեստորանային համալիրը և փաստացի ղեկավարել է այն:
Նախորդ քրեական գործի քննության ընթացքում Դարչինյանը կարճ ժամանակով դադարեցրել է «Ագնի» ռեստորանի գործունեությունը, ապա 2012 թվականի հունիսից նորից աշխատեցրել է այն:
Աշխատանքի ընթացքում ծանոթացել է մարմնավաճառուհիներ Անժելայի, Աննայի, Արաքսիի ու Լուսինեի հետ: Անժելայի ու Լուսինեի հետ պայմանավորվել է, որ մարմնավաճառ ցանկացող հաճախորդ ունենալու դեպքում կկանչի նրանց:
Ըստ դատական ակտի՝ 2012 թվականի սեպտեմբերից մինչև 2013 թվականի ապրիլ ամիսը Սերժիկ Դարչինյանը, օգտագործելով ու փաստացի ղեկավարելով «Ագնի» ռեստորանային համալիրը, 3 հազարից մինչև 5 հազար դրամ վարձավճարով ռեստորանի հարմարեցված սենյակները պոռնկությամբ զբաղվելու համար պարբերաբար տրամադրել է ռեստորանի տղամարդ հաճախորդներին ու մարմնավաճառներին՝ ստանալով գույքային օգուտ ու նպաստելով մարմնավաճառների կողմից պոռնկությամբ զբաղվելուն:
Սերժիկ Դարչինյանին մեղադրանք է առաջադրվել ՀՀ քրեական օրենսգրքի 262 հոդվածի 2-րդ մասի 5-րդ կետով:
Առաջադրված մեղադրանքում Սերժիկ Դարչինյանն իրեն մեղավոր չի ճանաչել: Նա ասել է, որ «Ագնի» ռեստորանն աշխատեցնելու ընթացքում ունեցել է տարբեր հաճախորդներ, որոնց մեջ եղել են զույգեր՝ տղամարդիկ ու կանայք, ովքեր ցանկության դեպքում մի քանի ժամով օգտվել են ռեստորանի ննջասենյակներից:
Դրանք տրամադրելու համար զույգերից վերցրել է երեքից հինգ հազար դրամ՝ կապված այն բանի հետ, թե քանի ժամով են զբաղեցրել ննջասենյակը:
Իրեն չի հետաքրքրել, թե ռեստորան եկող զույգերը սիրեկաննե՞ր են, թե՞ ամուսիններ, կամ՝ ինչո՞վ են զբաղվում ննջասենյակում:
Եղել են դեպքեր, երբ զույգերն իրենք են սննդամթերքը բերել, ինքը միայն պատրաստել ու մատուցել է սնունդը: Որևէ անգամ ինքը հաճախորդի համար աղջիկ չի հրավիրել, չի ծանոթացրել հաճախորդի հետ, մարմնավաճառների հետ պայմանավորվածություն չի ունեցել:
Անժելան ու Արաքսյան իրենց ընկերների հետ երկու անգամ այցելել են ռեստորան, զվարճացել, առանձնացել են ննջասենյակներում: Աղջիկները «Ագնի» են եկել հիմնականում նույն տղաների հետ, իրեն հետաքրքիր չի եղել՝ նրանք մարմնավաճառնե՞ր են, թե՞ տղաների սիրածները: Նրանցից վերցրել է միայն տրամադրած ննջասենյակի ու մատուցած սննդի գումարը:
Մինչև այս հոդվածով նախորդ անգամ դատվելը՝ շատ աղջիկներ են հաճախել «Ագնի»: Դատվելուց հետո ինքը աղջիկներից շատերի այցերը դադարեցրել է, որևէ մարմնավաճառի հետ առնչություն չի ունեցել:
Դատարանը Սերժիկ Դարչինյանի պատճառաբանություններն անհիմն ու անարժանահավատ է գնահատել:
Ըստ մարմնավաճառների՝ Սերժիկ Դարչինյանը հաճախորդ տղամարդկանցից հաճախ վերցրել է ամբողջ «սպասարկման», նաև՝ մարմնավաճառի հետ սեռական հարաբերություն ունենալու գումարը: Մարմնավաճառին տվել է հինգ հազար դրամ, սենյակի համար վերցրել է երեք հազարից հինգ հազար դրամ՝ կախված տարվա եղանակից ու «կլիենտից»:
Մարմնավաճառուհիներից մեկը իր ցուցմունքում նշել է, թե Սերժիկ Դարչինյանը «կլիենտ» լինելու դեպքում կանչում էր Արաքսյային, Լուսինեին, Աննային, «որ մեկին ասի, որին թողնի՝ շատ մարդու էր կանչում»:
Դատվելուց հետո Սերժիկը նորից ռեստորան է կանչել իր մտերիմ մարմնավաճառներին, «համագործակցել է» նրանց հետ՝ ասելով, թե գումարի կարիք ունի:
«Ագնի» ռեստորանային համալիրը քարաշեն կառույց է, գտնվում է Վանաձոր-Դիլիջան ավտոճանապարհին: «Ննջասենյակները» տեղավորված են երկրորդ հարկում:
Ընդհանուր իրավասության դատարանը հաստատված է գնահատել Դարչինյանի մեղքը պոռնկությանը նպաստելու համար: Նախորդ դատավճռով սահմանված ու պայմանականորեն չկիրառված պատիժը մասնակիորեն գումարվել է այս դատավճռով նշանակված պատժին:
Սերժիկ Դարչինյանը մեղավոր է ճանաչվել ՀՀ քրեական օրենսգրքի 262 հոդվածի 2-րդ մասի 5-րդ կետով, ու վերջնական պատիժ է նշանակվել 4 տարի ազատազրկումը՝ առանց գույքի բռնագրավման և առանց որոշակի գործունեությամբ զբաղվելու իրավունքից զրկելու:
Սերժիկ Դարչինյանի պատժի սկիզբը կհաշվվի նրան փաստացի կալանքի տակ առնելու օրից:
Դատավճռի դեմ վերաքննիչ բողոք էին բերել Դարչինյանն ու իր շահերի պաշտպանը:
Ըստ բողոքի՝ Սերժիկ Դարչինյանը չի կատարել իրեն մեղսագրված արարքը, նա մարմնավաճառների ու նրանց հաճախորդների հետ չի համագործակցել, չի նպաստել նրանց կողմից պոռնկությամբ զբաղվելուն:
Դարչինյանն աշխատեցրել է ռեստորանահյուրանոցային համալիրը, գումար է վերցրել մարդկանց սպասարկելու համար:
Պաշտպանը միջնորդեց արդարացնել Սերժիկ Դարչինյանին, կայացնել արդարացման դատավճիռ:
Սերժիկ Դարչինյանն ասաց, թե ինչպես նախորդ անգամ չէր հասկացել, թե ինչի համար դատվեց, այնպես էլ հիմա չի հասկանում: Ինքը հանցանք չի գործել, չի կատարել այն արարքը, որի համար դատապարտվել է:
Ինքը ոչ մի մարմնավաճառի կամ ոչ մի տղամարդու չի զանգահարել, չի կանչել «Ագնի»: Դրա ապացույցը հեռախոսային վերծանումներն են, որոնցով ակնհայտ է դառնում, որ ինքը մարմնավաճառուհիներին չի զանգել:
Նա ճանաչել է Անժելային: Բայց Անժելան, օրինակ, ապրիլի 16-ին՝ Հայաստանի ոստիկանության օրը, «Ագնի» է գնացել ոստիկան Արսենի հետ: Ասել են՝ եկել ենք մեր միլիցիայի օրը նշելու: Ինքն էլ ասել է՝ լավ եք արել: Ու նշել են «իրանց հավեսով»:
Սերժիկ Դարչինյանը նշեց, թե «Ագնի» ռեստորանահյուրանոցային համալիրից ընդհանրապես շատ ոստիկաններ են օգտվել: Նրանցից ոմանք, ըստ Դարչինյանի, գնացել, կերել-խմել են ու ասել են՝ հետո փողը կտանք: Երբ իր համբերության բաժակը լցվել է, ինքն ասել է. «Էսպես չի լինի, պետք է վճարեք, ես ծախսեր եմ անում, ապրանք եմ առնում, պարտքեր ունեմ»:
Դարչինյանի կարծիքով՝ ոստիկաններին դուր չի եկել, որ ինքը նրանցից գումար է պահանջել: Դրա համար էլ վրեժխնդիր են եղել՝ այս գործը գլխին սարքելով: Որովհետև մարմնավաճառուհի վկաներն ասել են, թե իրենք ցուցմունք են տվել ոստիկանների թելադրանքով:
Վերաքննիչ դատարանը ցանկացավ, որ Դարչինյանը կոնկրետացնի՝ ինչքա՞ն գումար են պարտք եղել ոստիկանները, ի՞նչ գումար է պահանջել Դարչինյանը, որ նրա դեմ «թշնամացել են» ոստիկանները:
Դարչինյանը կոնկրետ գումար չնշեց, ասաց, որ չի հիշում:
Դատարանն էլ նկատեց, որ առանց կոնկրետացման այդ հայտարարությունը շատ վերացական է:
Դարչինյանն ասաց, թե ի տարբերություն «դավադիրների»՝ ինքը հիշաչար չէ, չի ուզում մարդկանց վատություն անել…
Դարչինյանը որպես իր դեմ լարված «դավադրության» մասնակից նշեց նաև մարմնավաճառուհի Անժելային: Նա նախորդ քրեական գործի քննության ժամանակ Դարչինյանի օգտին է ցուցմունք տվել: Իսկ հետո մոտեցել է նրան ու ասել. «Քո օգտին ցուցմունք տվեցի, բայց դու ինձ վերաբերմունք ցույց չտվեցիր»:
«Ի՞նչ վերաբերմունք էր ուզում իրականությունն ասելու համար»,- տարակուսեց Դարչինյանը՝ նշելով, թե մարմնավաճառուհին «վերաբերմունք» ասելով՝ երևի գումար տալը նկատի ուներ: Միայն թե ինքը նրան ինչո՞ւ պիտի գումար տար, նա իրականությունն է ասել, ոչ թե իրեն լավություն է արել:
Բայց «վերաբերմունքի» չարժանացած Անժելան, ըստ Դարչինյանի, թշնամացել է, միացել ոստիկանների «դավադիր» խմբին ու այս անգամ Դարչինյանի դեմ այնպիսի ցուցմունքներ է տվել, որոնք իրականությանը բոլորովին չեն համապատասխանում:
Սերժիկ Դարչինյանը նույն միտքը կրկնում էր վեց-յոթ անգամ, մինչև որ վերաքննիչի դատավորների համբերությունը սպառվեց, նրանք դիտողություն արեցին ամբաստանյալին:
Դարչինյանը վերաքննիչ դատարանին խնդրեց, որ Լոռու դատարանի նման չդատի, այլ երևանյան դատարան լինելով՝ տարբերվի ու ճիշտ դատի, այսինքն՝ իրեն արդարացնի:
Սերժիկ Դարչինյանի խնամքին է ոտքն անդամահատված հաշմանդամ կինը:
Դատարանի դահլիճում ներկա բարեկամն ասաց, թե իրենք պայքարում են, որ Սերժիկը չազատազրկվի, թե չէ ո՞վ պիտի խնամի խեղճ կնոջը: Տղա էլ չունեն, իսկ աղջիկներն իրենց ընտանիքներն ու հոգսերն ունեն, «դուրս են գնացել՝ էրկու կոպեկ աշխատելու»:
Բարեկամն ասաց, թե Սերժիկը շատ կորուստներ կրած, դրա արդյունքում մի քիչ էլ «համակարգը խախտված» մարդ է, վաթսունմեկ տարեկան, կարո՞ղ է չորս տարի ազատազրկում կրել ու դուրս գալ: Բարեկամի նկարագրությամբ՝ «Ագնի» համալիրը մի ամայի տեղում է, սարի փեշին: Նախկին վարձակալության ընթացքում Սերժիկը պարտք է եղել տիրոջը, հետո համալիրն աշխատեցրել է տիրոջ պահանջով, որ գումար աշխատի, պարտքը փակի, նոր միայն հանձնի:
«Ես չէի ուզում աշխատել էնտեղ, բայց պարտքը ստիպեց: Ես ոչ մի ավելորդ դրամ չեմ վերցրել հաճախորդներից՝ միայն սննդի ու սենյակի արժեքը: Ես մեղավոր չեմ…»,- հավաստիացնում էր Դարչինյանը:
Նա անվերջ նույն նախադասություններն էր կրկնում նաև ամբողջ ժամանակ, մինչ դատարանը խորհրդակցական սենյակում էր:
Վերաքննիչ քրեական դատարանը մերժեց Սերժիկ Դարչինյանի ու նրա շահերի պաշտպանի վերաքննիչ բողոքը:
Ընդհանուր իրավասության դատարանի դատավճիռը թողնվեց անփոփոխ:
Եթե այս դատական ակտը չբողոքարկվի, ապա մեկ ամիս հետո՝ դատավճիռն ուժի մեջ մտնելուն պես, Սերժիկ Դարչինյանը կալանավայր կուղարկվի, որ կրի չորս տարի ազատազրկումը:
Վերաքննիչ դատարանի որոշման հրապարակումից հետո հիասթափված Դարչինյանն ասաց, թե իր համար Երևանի դատարանը Լոռու դատարանից ոչ մի բանով չտարբերվեց…