Սփյուռքի նախարարության նախաձեռնությամբ իրականացվող «Սփյուռք» ամառային դպրոցի լրագրողների վերապատրաստման, երիտասարդ առաջնորդների և Սփյուռքի հայկական կրթօջախների ուսուցիչների վերապատրաստման դասընթացների մասնակիները հուլիսի 29-ին այցելել են Ազգային ժողով:
Նրանք հանդիպել են ԱԺ նախագահ Գալուստ Սահակյանի և սփյուռքի նախարար Հրանուշ Հակոբյանի հետ:
Ողջունելով ներկաներին՝ ԱԺ նախագահը նշել է, որ այսպիսի ծրագրերը ոչ միայն Հայաստանը տեսնելու, հայերեն սովորելու հնարավորություն են ընձեռում Սփյուռքի մեր հայրենակիցներին, այլև նպաստում են հայի ինքնության ամրապնդման, ազգային խնդիրները միջազգային հանրությանը ներկայացնելուն և համախմբված գործունեություն ծավալելուն:Գ.Սահակյանը անդրադառնալով Հայաստան-Սփյուռք հարաբերություններին, նշել է, որ Հայաստանը հզոր է Սփյուռքով, Լեռնային Ղարաբաղով և միասնական է ողջ հայությանը հուզող խնդիրների լուծման գործում:
ԱԺ նախագահ Սահակյանը նաև պատասխանել է ամառային դպրոցի մասնակիցների հարցերին, որոնք վերաբերել են Հայաստան-Սփյուռք գործակցության խորացմանը, սփյուռքահայությանը վերաբերող ծրագրերի շարունակականությանը, Հայոց ցեղասպանության 100-րդ տարելիցին ուղղված միջոցառումներին, ՀՀ վարած արտաքին քաղաքականությանը:
Ադրադառնալով արտագաղթին վերաբերող հարցին՝ ԱԺ նախագահը նշել է, որ նորանկախ Հայաստանն ունի հզոր ներուժ՝ իր շուրջը համախմբելու ողջ հայությանը, և տնտեսությունը զարգացնելու դեպքում արտագաղթն էապես կնվազի:
Պարսկահայ համայնքի ներկայացուցչի կողմից առաջարկություն է հնչել, թե առաջիկա խորհրդարանական ընտրություններին մասնակցեն նաև նաև սփյուռքահայությանը:
Գ.Սահակյանը պատասխանել է, որ ժամանակին այդ այդպիսի առաջարկություն հնչել է նաև ՀՀ սփյուռքի նախարար Հրանուշ Հակոբյանի կողմից: Ցանկալի է սփյուռքահայության մասնակցությունը հայրենիքի քաղաքական կյանքին, սակայն կան կազմակերպչական լուրջ խնդիրներ, որոնց լուծումը ժամանակ է պահանջում:
Հանդիպման ավարտին ՀՀ ԱԺ նախագահը համոզմունք է հայտնել, որ նմանատիպ ծրագրերը կբազմապատկվեն, և Սփյուռքի հայկական համայնքների ներկայացուցիչները հնարավորություն կունենան Հայաստանում նաև կատարելագործելու հայերենը:
Սփյուռքահայ երիտասարդները ծանոթացել են ԱԺ կառուցվածքին, գործունեությանն ու ծրագրերին: Հանդիպմանը մասնակցում էին շուրջ 120 սփյուռքահայ երիտասարդներ Ռուսաստանի, Ուկրաինայի, Իրանի, Շվեդիայի, Ուրուգվայի, Իտալիայի, Վրաստանի հայկական համայնքներից: