Դերասանուհի Եվա Գրինը բանակցություններ է վարում Թիմ Բերթոնի նոր «Տարօրինակ երեխաների տունը» կինոպրոյեկտում մասնակցության համար: Ֆիլմի արտադրությամբ կզբաղվեն Chernin Entertainment ընկերությունն ու Fox ստուդիան: Պրեմիերայի ամսաթիվը նշանակված է 2015 թ. հուլիսի 31-ին, հաղորդում է The Hollywood Reporter-ը: Ֆիլմը հիմնված է Ռենսոմ Ռիգսի «Տարօրինակ երեխաների համար նախատեսված միսս Պերեգրինի տունը» վեպի վրա:
Սյուժեի կենտրոնում 16-ամյա Ջեյկոբն է: Մանուկ հասակում պապիկը նրան սարսափելի պատմություններ է պատմել տարօրինակ երեխաների համար նախատեսված տան մասին: Տան բնակիչներից են մի աղջիկ, որը կարողացել է ձեռքերում կրակ պահել, անտեսանելի տղան, առանց բառերի շփվող երկվորյակները և ևս մի աղջիկ, որը քայլում է առանց ոտքերն գետնին դնելու:
Եվա Գրինը պետք է խաղա միսս Պերեգրինի դերը, որը մանկատան խնամակալն է: Հայտնի չէ, թե ովքեր կխաղան մնացած դերերը: