Չարբախ ավանի Հովհաննիսյան 119 շենքի բնակչուհի Մարիամ Մարտիրոսյանը իր ընտանիքի 17 անդամների հետ ապրում է մեկ բնակարանում: «Կվարտիրան բաժանված է տարբեր մասերի, սենյակներում տեղավորվել են տղաներիս ընտանիքների անդամները: Սենյակներից մեկում ապրում է մի տղայիս ընտանիքը՝ 6 երեխա ունեն, 8-ով մեկ սենյակում են ապրում»,- ասաց տիկին Մարիամը «Առաջին լրատվական»-ի հետ զրույցում:
Առանձնացված սենյակները, ըստ էության, ընտանիքի անդամների հմար հանդիսանում են «տներ»: Տիկին Մարիամի 2 տղաները աշխատում են, մեկը կոշկակար է, իսկ մյուսն աշխատում է ավտոլվացման կետում:
«Ամուսինս փինաչիությամբ նույնիսկ չի կարողանում երեխեքին սնունդ առնել, 6 երեխեքիցս 4-ը դպրոցական են, բազմաթիվ հոգսեր ունեն, ես չեմ աշխատում, երեխաներիցս երկուսը իմ խնամքի կարիքն ունեն»,- ասաց տիկին Մարիամի հարսներից մեկը՝ հավելելով, որ իրենց օրենքով նպաստ է հասնում, բայց չեն ստանում՝ անհիմն պատճառաբանություններով:
«3-րդ երխայից նպաստ չեմ ստանում, սոցապ նախարարությունում ասում են՝ մի մուտքից եք մտնում-դուրս գալիս, հոսանքի փող շատ եք վճարում, գնա վարձով ապրի, որ ոչ մեկի կոմունալը չխանգարի, բայց ովքե՞ր են իմ երեխաներին պահելու, տե՞գրս, տա՞լս՝ չէ, իրենք առանձին տնտեսություն են՝ առանձին հոգսերով»,- ասաց նա:
Մարիամ Մարտիրոսյանի ընտանիքում նաև հաշմանդամություն ունեցող երեխա կա, ում թոշակը բավարարում է միայն կոշիկ առնելու համար: Տիկին Մարիամը այլևս հույսեր չունի, որ մեր երկրում կարող են հասարակ բազմազավակ ընտանիքներին գոնե օրենքի շրջանակներում աջակցել: Ըստ նրա՝ փոխարենը «մահանաներ են փնտրում» օգնությունից զրկելու համար:
Առավել մանրամասն՝ տեսանյութում:
