Ըստ Բոստոնի համալսարանի և Ուորիքի բիզնես-դպրոցի վերլուծաբանների հետազոտության՝ շուկայի հաջորդ «անկումը» հնարավոր է կանխատեսել Google որոնողական համակարգում որոշակի հարցումների միջոցով: Նրանք այդ հարցումների ավտոմատ նույնականացման մեթոդ են մշակել շուկայի զարգացման ընդհանուր միտումը կազմելու համար: Հետազոտության արդյունքները հրապարակվել են PNAS ամսագրում:
2004-2012թթ. տվյալների դեպքում կիրառական մեթոդը ցույց է տալիս, որ բիզնեսի և քաղաքականության թեմայով հարցումների ավելացումը նախորդում է անկումներին ֆոնդային շուկայում:
Հետազոտողները պնդում են, որ այդ մեթոդիկան կարող է ֆինանսական վերլուծաբաններին օգնել կանխագուշակել շուկայի անկումները: Այդպիսով հարցումները Google-ում նախազգուշացնող նշաններից առաջինն են, որոնց արժե ուշադրություն դարձնել:
«Որոնողական հարցումների զեկույցները մեզ հնարավորություն են տալիս ավելի շատ բան իմանալ այն մասին, թե մարդիկ ինչպես են առցանց տեղեկություն հավաքում նախքան իրական աշխարհում որոշում ընդունելը: Այդպիսով պոտենցիալ կա, որ այդ տվյալներն օգտագործեն կանխատեսելու համար՝ մարդկանց մեծ խմբեր ինչ կարող են անել իրական կյանքում»,- բացատրում է հետազոտության առաջատար հեղինակ Չեսթեր Քյորմը:
Տվյալ հետազոտության ընթացքում գլխավոր առաջադրանքը եղել է բառերի կոնկրետ տեսակի որոշումը, որոնք կարող են կապ ունենալ հանրային շահ ներկայացնող վարքի հետ:
Նախորդ հետազոտությունների արդյունքում Քյորմն ու նրա գործընկերները պարզել են, որ Google-ի և «Վիքիպեդիայի» օգտագործման մասին տվյալները կարող են վաղ զգուշացումներ պարունակել ֆոնդային շուկայի դինամիկայի մասին: Քյորմն ու նրա թիմն ալգորիթմի մշակման համար ըստ քանակի որոշել են «Վիքիպեդիայում» օգտագործված յուրաքանչյուր բառի նշանակությունը, ինչը հնարավորություն է տվել բառերը դասակարգել ըստ թեմաների, օրինակ՝ «բիզնես» կատեգորիային վերաբերում են այնպիսի հարցումներ, ինչպիք են՝ «բանկ» կամ «կառավարում»:
Հետո գիտնականները Google Trends-ի միջոցով փորձել են պարզել՝ որքան հաճախ են այդ բառերը 2004 և 2012թթ. ընթացքում որոնել ամերիկացի օգտատերերը: Այդպես նրանք պարզել են բիզնեսի թեմայով հարցումների հաճախության համամասնական կախվածությունը ֆոնդային շուկաների անկումից: