«ForRights.am»-ը գրել է.
«Էդ օրը եկան 7-8 տղամարդիկ ու իմ էրեխուն բառիս բուն իմաստով հիվանդանոցից գողացան-տարան դատարան: Ոչ մեկիս բանի տեղ չդրեցին, ես հաշմանդամ մարդ եմ, ինձ բրդեցին-գցեցին գետնին ու վրայովս անցան, հետո 7 ժամ ես բոքսում եմ եղել»,- «ForRights.am»-ին պատմեց «Վերնիսաժի» գործով կալանավորված Վալերի Հովհաննիսյանի հայրը` Սամվել Հովհաննիսյանը:
Վալերիի շահերը ներկայացնող փաստաբան Լեւոն Բաղդասարյանը փորձել է թույլ չտալ Հովհաննիսյանի տեղափոխումը, քանի որ ունեցել է հերթապահ բժշկի տեղեկանք այն մասին, որ հրազենային 3 վնասվածք ստացած Վալերին վիրահատությունից հետո խնամքի կարիք ունի և այդ պահին նա չէր կարող մասնակցել որեւիցե քննչական գործողության:
«Ինձ ուղղակի դուրս հանեցին հիվանդասենյակից եւ սպառնացին, որ եթե նորից փորձեմ ներս մտնել, ապա հրազեն կգործադրեն: Ես զրկվեցի իմ վստահորդի կողքին լինելու իրավունքից»,- «ForRights.am»-ին տված հարցազրույցում ասաց փաստաբան Լեւոն Բաղդասարյանը:
Շտապօգնության աշխատակիցը փաստաբանին հայտնել է, որ իրենք պետք է ընդամենը տեղափոխեն Հովհաննիսյանին դատարան, սակայն տղայի վիճակն այնքան ծանր է եղել, որ բժիշկը մնացել է նրա կողքին մինչեւ դատաքննության ավարտը, որը տեւել է մոտ 4 ժամ:
«Կես ժամը մեկ ցավազրկող էին ներարկում: Վալերի Հովհաննիսյանն ի վիճակի չէր որեւէ կերպ մասնակցելու իրեն վերաբերող դատական գործընթացին: Նա միայն կարողանում էր մի կերպ շուրթերը շարժել` հասկացնելով, որ ջուր է ուզում: Ես դատարանում առարկել եմ քննիչի գործողությունների դեմ, Վալերի Հովհաննիսյանն ի վիճակի չէր այդ պահին գիտակցելու, թե ինչ գործողություններ են կատարվում իր նկատմամբ, կարելի է ասել, որ դատարանը որոշում է կայացրել այդ պահին անմեղսունակ անձի նկատմամբ»,- ասաց Լեւոն Բաղդասարյանը:
Դատավոր Էդիկ Ավետիսյանի որոշմամբ` Վալերի Հովհաննիսյանի խափանման միջոցը ընտրվել է կալանք 2 ամիս ժամկետով եւ նրան կալանավայր են տեղափոխել հենց դատարանի դահլիճից` պատգարակով: Սակայն տղայի վիճակն այնքան ծանր է եղել, որ Նուբարաշենի քրեակատարողական հիմնարկում չեն ընդունել Վ. Հովհաննիսյանին` խորհուրդ տալով նրան տեղափոխել քաղաքացիական հիվանդանոց, փոխարենը Վալերիին տեղափոխել են Դատապարտյալների հիվանդանոց, որտեղ էլ նա գտնվում է մինչ օրս:
Փաստաբան Լեւոն Բաղդասարյանը կարծում է, որ իր վստահորդը խոշտանգումների է ենթարկվել եւ պատրաստվում է այս գործով դիմել Մարդու Իրավունքների Եվրոպական Դատարան: «Վալերի Հովհաննիսյանին կալանավորելով` քննիչն ու դատարանը խախտել են ՀՀ քրեական օրենսգրքի 11 հոդվածի պահանջը` այն է, որ ոչ ոք չպետք է ենթարկվի խոշտանգումների կամ դաժան, անմարդկային կամ իր արժանապատվությունը նվաստացնող վերաբերմունքի կամ պատժի»:
15 տարի Ռուսաստանում ապրած 29-ամյա Վալերի Հովհաննիսյանը Հայաստան էր եկել ամուսնանալու նպատակով, հավանած աղջիկ էլ ուներ, սպասում էր մինչեւ նա ուսումն ավարտի, սակայն մայիսի 17-ին Վերնիսաժում հնչած կրակոցները կտրուկ փոխեցին Վալերիի կյանքը: Այդ օրը Վալերին իր ավտոմեքենայով գնացել էր ընկերոջը` Ներսես Մելքոնյանին հիվանդանոց տանելու: Ավտոմեքենան կայանել էր Վերնիսաժի տարածքում եւ բարձրացել էր ընկերոջ տուն, մոտ 10 րոպե անց երբ միասին վերադարձել էին մեքենայի մոտ, այնտեղ հանդիպել էին Գոռ Առաքելյանին, ում բարկացրել էր այն փաստը, որ Վալերիի ավտոմեքենան փակել էր իր ճանապարհը:
Նյութն ամբողջությամբ՝ սկզբնաղբյուր կայքում