ՀԱՊԿ գլխավոր քարտուղարը չափազանց կարևոր է համարում ժամանակակից աշխարհի պայմաններում ՀԱՊԿ երկրների միջև ռազմական փոխգործակցության հաստատումը՝ հայտարարել է Նիկոլայ Բորդյուժան Ղրղըզստանում «Անխախտ եղբայրություն-2014» խաղաղարար զորավարժությունների բացման արարողությանը: Այս մասին հայտնում է RIA Novosti-ն:
Զորավարժությունները մեկնարկում են այսօր՝ Բիշքեկի արվարձանում գտնվող «Ալա-Տոո» զորակայանում: Մանևրումներին կմասնակցեն ՀԱՊԿ անդամ երկրների 10 գումարտակներ. 3-ական՝ Ռուսաստանից ու Ղազախստանից, իսկ մյուս երկրներից՝ Հայաստանից, Տաջիկստանից, Բելառուսից և Ղրղըզստանից՝ 1-ական: Զորավարժությունները կշարունակվեն մինչև օգոստոսի 1-ը:
«Ժամանակակից աշխարհի իրողություններում, երբ տարբեր ահաբեկչական կազմակերպություններ ապակառուցողական գործունեություն են վարում, չափազանց կարևոր է փոխգործակցության հաստատումը ՀԱՊԿ մասնակից երկրների ռազմական կառույցների միջև»,- հայտարարել է Բորդյուժան:
Նրա խոսքով՝ զորավարժություններին մասնակցում են ՀԱՊԿ 6 երկրների տարբեր ստորաբաժանումներից ավելի քան 700 զինծառայողներ:
