Օրեր առաջ «Առաջին լրատվական»-ը գրել էր, որ նախագահի աշխատակազմի ղեկավարի տեղակալ, ԱԺ-ում նախագահի մշտական ներկայացուցիչ Վիկտոր Դալլաքյանի դուստրը` Լիլիթ Դալլաքյանը, աշխատանքի է անցել պաշտպանության նախարարությունում և ներկայացրել որոշ հետաքրքրաշարժ մանրամասներ:
Մասնավորապես, գրել էինք, որ նա աշխատանքի անցնելու համար պահանջվող դիմումին կից ինքնակենսագրականում նշել է, որ ինքն ավարտել է լատինաամերիկյան պարերի դպրոցը, թեև ունի նաև իրավաբանական կրթություն, ապա մանրամասն նկարագրել էր, թե ով է իր հայրը, որտեղ է աշխատում: Ապա շարադրել էր նաև մոր տվյալները՝ ով է մայրը և որտեղ է աշխատում: Դալլաքյանի կինն էլ, հիշեցնենք, աշխատում է ՀՀ Վերահսկիչ պալատում: Բայց ամենաուշագրավն այն է, որ պաշտպանության նախարար Սեյրան Օհանյանը մակագրել էր այդ զավեշտալի դիմումը ոչ պակաս զավեշտալի մակագրությամբ. Սեյրան Օհանյանը Դալլաքյանի դստեր դիմումը մակագրել է այս բովանդակությամբ՝ «Ընթացք տալ մեր ընկերոջ դստեր դիմումին», որից հետո պարուհի Լիլիթն աշխատանքի էր անցել նախարարությունում՝ պահանջելով հատուկ պայմաններով, օդափոխիչով աշխատասենյակ և գործուղումներով հարուստ աշխատանքային գրաֆիկ:
«Առաջին լրատվական»-ի տեղեկություններով՝ մեր հրապարակումից հետո նախագահականում խոսակցություն է եղել այս փաստի առնչությամբ: Պաշտպանության նախարարությունից պահանջվել են աղջկա դիմումը՝ մակագրությամբ, և ինքնակենսագրությունը, և համոզվելով, որ մամուլում հրապարակվածը համապատասխանում է իրականությանը, խոսակցությունն ավելի է թեժացել:
Նույն տեղեկությունների համաձայն՝ այդ քննարկումների հետևանքը եղել է այն, որ Դալլաքյանի աղջիկը հետին ամսաթվով հեռացվել է աշխատանքից:
Նշենք, որ երբ «Առաջին լրատվական»-ը Սեյրան Օհանյանից հետաքրքրվել էր Դալլաքյանի աղջկա հարցով, նախարարը հերքել էր, թե աղջիկը նախարարությունում է աշխատում: «Այդպիսի բան չկա»,- ասել էր պաշտպանության նախարարը:
