Հայաստանում ԱՄՆ դեսպան Ջոն Հեֆերնից «Առաջին լրատվական»-ն այսօր հետաքրքրվեց՝ ստատուս քվոն ինչի՞ հաշվին է պահպանվում՝ հաշվի առնելով այն հանգամանքը, որ դիվերսիոն գործողությունները սահմանին ավելի են շատանում:
«Ինչպես գիտեք, Միացյալ Նահանգները ԵԱՀԿ Մինսկի խմբի համանախագահ է, որը միջնորդում է այս հակամարտությանը: Համանախագահները կանոնավոր հանդիպումներ են ունենում՝ հետագա քայլերը քննարկելու համար»,- ասաց դեսպանը՝ հույս հայտնելով, որ ոչ հեռու ապագայում երկու նախագահների միջև տեղի կունենա հանդիպում, իսկ համանախագահների ուղերձը հստակ է և հետևողական:
Դեսպանի խոսքով՝ այս հակամարտության լուծման համար կա միայն մեկ ճանապարհ՝ խաղաղ բանակցային լուծում: Նա նաև նշեց, որ համանախագահները խստորեն քննադատում են ռազմական հռետորաբանությունը, դատապարտում են հրադադարի խախտումները և իրենց վշտակցությունն են հայտնում բոլոր նրանց, ովքեր տուժում են շփման գծում և միջազգային սահմանին տեղի ունեցող միջադեպերից:
«Պետքարտուղար Քերին վերահաստատել է մեր հանձնառությունը՝ այս հակամարտությանը խաղաղ բանակցային լուծում հաստատելու ճանապարհին»,- ասաց դեսպանը:
Հարցին՝ արդյոք Տիգրան Սարգսյանն այն լավագույն կա՞դրն էր, որ պետք է նշանակվեր ԱՄՆ-ում Հայաստանի դեսպան, Ջոն Հեֆերնը պատասխանեց՝ յուրաքանչյուր երկիր ինքն է ընտրում իր դեսպաններին, որոնք ներկայացնում են իրենց երկիրը. «Վարչապետի պաշտոնում աշխատելու տարիներին համագործակցել ենք պարոն Սարգսյանի հետ և կարծում եմ՝ Վաշինգտոնում նրա աշխատելու տարիներին նույնպես կհամագործակցենք»:
Լուսանկարը՝ Armenpress-ի