Ռիչարդ III-ի գերեզմանը, որը հայտնաբերվել է 2012 թ, բացվել է հանրության համար, հաղորդում է BBC News-ը, սակայն թագավորի աճյունը այցելուները տեսնել չեն կարող։
Մոտավորապես հարյուր այցելուներ հետևել են, թե ինչպես քաղաքապետ Փիթեր Սուլսբին կտրել է նոր մշակութային կենտրոնի բացման ժապավենը։ Կենտրոնի արժեքը 4 միլիոն ֆունտ ստեռլինգ է։ Առաջին հարկը կծանոթացնի տիրակալի կյանքի էպիկական պատմությանն ու 1485 թ. նրա մահվան հանգամանքներին Բոսվորթի մոտ ճակատամարտում, որը վերջ դրեց Սպիտակ և Կարմիր վարդերի 32-ամյա պատերազմին։ Համալիրի երկրորդ հարկը պատմում է հնէաբանների կատարած աշխատանքի մասին, որն էլ հենց հանգեցրել է թագավորի կմախքի հայտնաբերմանը և նույնականացմանը։ Իսկ հետո հանրությունը կարող է տեսնել միապետի թաղման տեղը։
Մայիսին բրիտանական դատարանը որոշում կայացրեց, որ Ռիչարդ III-ի աճյունը պետք է թաղվի հայտնաբերված վայրի մոտ գտնվող տաճարում։ Թագավորի սերունդները ցանկություն հայտնեցին, որ նա թաղվի Յորքի եկեղեցում, սակայն գերագույն դատարանը նրան Լեսթերից տեղափոխելու որևէ հիմք չգտավ։ «Մենք միայն ցանկանում ենք, որ Ռիչարդ III-ի աճյունը արժանապատվորեն հանձնեն հողին և, վերջիվերջո, հանգիստ թողնեն»,- ասում են դատավորներն իրենց վճռում։ Բրիտանիայի իշխանություններն արդեն ծրագիր են կազմել Լեսթերյան տաճարում հուղարկավորության հանդիսավոր արարողության համար, որը տեղի է ունենալու 2015 թ. սկզբին։