«Ես տեսնում եմ երիտասարդության մի կորիզ՝ հայրենասեր, ազնիվ, ես տեսնում եմ՝ նրանք պայքարում են, նրանց կողքին եմ, բայց այդ կորիզը քիչ է երկրում տիրող անարդարության դեմ պայքարելու համար»,- «Առաջին լրատվական»-ի հետ զրույցում ասաց երգիչ- երգահան Արթուր Իսպիրյանը՝ հավելելով, որ պիտի համախմբում լինի, ինչը դեռ չի երևում:
Արթուր Իսպիրյանը տանը նստած բոլոր «պայքարողներին» կոչ է անում միանալ և իրենց իրավունքները սեփական երկրում պաշտպանել: «Հեղափոխություն ասվածից ես էլ եմ վախենում, բայց իշխանությունները պետք է գիտակցեն՝ բավական է, արտագաղթի չափերը պետք է կրճատվեն. հիմա արտագաղթը չափ ու սահման չունի»,- նկատեց Արթուր Իսպիրյանը՝ հավելելով, որ արտագաղթը իր ընկերների շրջապատում ևս անցել է բոլոր սահմանները: «Արտագաղթը հեռախոսիս վրա եմ զգում. եթե նախկինում 50 ընկեր էր զանգում, այսօր՝ 2 -ը, մնացած բոլորը երկրում չեն»,- ասաց երգիչը: Նա նկատեց, որ քաղաքացիների հանդեպ ոտնձգություն է տեսնում գրեթե ամեն ոլորտում՝ քաղաքաշինությունից մինչև բժշկություն և դատական ու հարկադիր մարմիններ. «Անիմաստ նյարդայնացնում են մարդկանց, որ թողնեն-գնան»:
Արթուր Իսպիրյանը սեփական օրինակն էլ է բերում: Օրերս մտել է բանկ՝ որդուն բժկի տանելու համար հաշվեհամարից գումար հանելու, բայց պարզվել է՝ հաշիվը սառեցված է. «Ասացին՝ 10 հազար դրամ տուգանք ունեք, չեք վճարել: Բայց ես ծանուցում չէի ստացել… Անարխիայի է հասել. մտնել մարդկանց հաշվի մեջ: Եթե սառեցնում եք, գրողը ձեզ տանի, գոնե 10 հազարը սառեցրեք, ոտնձգություն մի՛ արեք»,- հավելեց երգահանը:
Նրա դիտարկմամբ՝ Հայաստանում կառավարման լուրջ խնդիրներ կան: 20 տարի է՝ երկիրը թալանվում է, իսկ բարեփոխումներ այդպես էլ չեն նշմարվում:
Արթուր Իսպիրյանը անդրադարձավ նաև վարչապետի հնչեցրած այն մտքին, թե 100 օրվա ընթացքում փոփոխություններ են բերել: «100 օրում ասել, որ փոփխություններ են արվել, կամ կարող են՝ արվել ծիծաղելի է»,- նկատեց նա:
Առավել մանրամասն՝ տեսանյութում: