«Բողոք երկրի սրտից» հաղորդաշարի հերթական թողարկումը նվիրված է բռնադատվածի առաջին կարգի ժառանգ Աննա Մարտիրոսյանին, որը դժգոհում է պետության կողմից իրենց տրվող վարկի՝ օրեցօր աճող տոկոսադրույքներից:
«Երբ Հայաստանում հաստատվեցին դեմոկրատական կարգեր, մենք դիմում-նամակով դիմեցինք Լևոն Տեր-Պետրոսյանին՝ որպես բռնադատվածի ժառանգներ: Նա մեր դիմումը հարգեց: Օրենքն արդարացրեց բռնադատվածներին և առաջին հերթին՝ ժառանգներին»,- «Առաջին լրատվական»-ին պատմեց նա:
Մարտիրոսյանը նշեց, թե իրենց գրքույկ տվեցին, խոստացան Տեր-Պետրոսյանի օրոք դեռ երկրորդ հերթի ժառանգներին էլ հաշվի առնել, վճարեցին 12 հազար դրամ կորցրածի փոխարեն: «Դա ծովում մի կաթիլ ջուր էր: Այն, ինչ մեր պապերից ու ծնողներից թալանել են, տարել, մենք ոչինչ չենք ստացել: Դրա փոխարեն անհատույց տալիս էին 5 մլն դրամ վարկ, ղեկավարության փոփոխման հետ դա դարձավ վճարովի: Ռոբերտ Քոչարյանի օրոք պետք է ստանայինք 5 մլն դրամ վարկ, Սերժ Սարգսյանի օրոք 1 % տոկոսադրույք դրեցին, որ 25 տարում 1 մլն 250 հազար է կազմում՝ չհաշված, որ հանրապետությունում եթե թանկացումներ լինեն, վարկն էլ պիտի մեծանա»,- ասաց նա:
Մարտիրոսյանը տեղեկացրեց, թե կառավարությունից խնդրում և պահանջում են չեղյալ համարել այդ վարկն իր տոկոսներով, այդ օրեցօր աճող վարկը, եթե այն չեղյալ չհամարվի, պահանջում են իրենց վճարել տոկոսներով, տոկոսի տոկոսներով՝ պապերից, ծնողներից թալանված ողջ ունեցվածքը՝ ցանկացած տեսքով՝ բնակարանի, ունեցվածքի, հողի, անասունների, ինչ տեսքով էլ լինի:
Մանրամասները՝ տեսանյութում:
