Ուկրաինայի արևելքում մալայզիական Boeing-777 ինքնաթիռի կործանումն ու 298 անմեղ զոհերը շրջադարձային նշանակություն ունեցան ուկրաինական ճգնաժամի, Ուկրաինայում Ռուսաստանի և Արևմուտքի քաղաքականության համար: Արևմտյան առաջնորդները էականորեն խստացրեցին Ռուսաստանին ուղղված իրենց հռետորաբանությունը:
Ռուսաստանին սթափեցնող ամենալուրջ դիտարկումները, թերևս, Բրիտանիայի վարչապետ Դևիդ Քեմերոնինն էին, ով կոչ արեց Եվրոպային Ռուսաստանի դեմ պատժամիջոցների երրորդ մակարդակ, այսպես կոչված` երրորդ փաթեթը կիրառել, որոնք կվերաբերեն ռուսական տնտեսության առանձին ոլորտներին, այդ թվում` նաև էներգետիկային, քանի որ, նրա իսկ պնդմամբ, մի շարք ապացույցներ կան այն մասին, որ Ուկրաինայի արևելքում գտնվող աշխարհազորայիններին Ռուսաստանն է տրամադրել «Բուկ» տեսակի ԶՀԿ-ն, որի հարվածից էլ կործանվել է ինքնաթիռը: Այդ պատճառով էլ, Քեմերոնի կարծիքով, Ռուսաստանը պետք է պատասխան տա դրա համար: Նա նաև կոչ է արել ԵՄ-ին դադարեցնել ՌԴ-ին պաշտպանողական արտադրանք մատակարարել և քննադատել է Ֆրանսիային Ռուսաստանին «Միստրալ» դասի ուղղաթիռներ վաճառելու համար՝ նշելով, որ Բրիտանիայի համար դա անընդունելի է: Եվ, ինչն ամենասարսափեցնողն է Ռուսաստանի համար, առաջարկել է սառեցնել Ռուսաստանի նախագահ Վլադիմիր Պուտինի մերձավոր օլիգարխների հաշիվները:
Ռուսաստանի դեմ կտրուկ գործողություններին կողմ են արտահայտվել նաև Լեհաստանը, ԱՄՆ-ն, Ուկրաինան, Ավստրալիան, Նիդեռլանդները, Ֆինլանդիան, Գերմանիան, Լիտվան: Սակայն Ռուսաստանի և նրանց աջակցությունը վայելող ահաբեկիչների կողմից սև արկղերի և զոհերի դիակների տրամադրումն, ըստ էության, ԵՄ-ը կառուցողականություն դիտարկեց, և օրերս ԵՄ ԱԳՆ ղեկավարները հետաձգեցին Ռուսաստանի նկատմամբ նոր պատժամիջոցների վերաբերյալ որոշման ընդունումը՝ որոշման ընդունումը տեղափոխելով հուլիսի 24-ին: Այդ օրը ԵՄ ԱԳՆ ղեկավարները երեկ ծրագրում էին հրապարակել ռուսաստանցի այն իրավաբանական և ֆիզիկական անձանց ցուցակը, որոնց նկատմամբ պատժամիջոցներ կսահմանվեն, այնինչ ավելի ուշ հայտնի դարձավ, որ ԵՄ-ն պատրաստ է արգելք դնել միայն Ռուսաստանի հետ պաշտպանական-արդյունաբերական համալիրի ոլորտում նոր պայմանագրերի վրա: Ամեն դեպքում, ԵՄ կողմից պատժամիջոցների երրորդ փաթեթի կիրառումը շարունակում է մնալ բանակցային սեղանին:
Նոր պատժամիջոցների ազդեցության վերաբերյալ «Առաջին լրատվական»-ին իր վերլուծությունը ներկայացրեց Ռուսաստանի «Ազգային էներգետիկ անվտանգության հիմնադրամի» հիմնադիր և գլխավոր տնօրեն, տնտեսական և քաղաքական վերլուծաբան Կոնստանտին Սիմոնովը: Նա հուսով է, որ պատժամիջոցների երրորդ փաթեթ չի լինի, քանի որ Ռուսաստանն անում է ամեն ինչ, որպեսզի եվրոպացիներին հիմքեր չտա այդ պատժամիջոցների գործարկման համար:
«Տեսնում ենք, թե Լոնդոնի հետ կապված ինչ իրավիճակ է զարգանում: Ամեն դեպքում, չնայած որոշ արևմտյան գործիչների հիստերիային, Ռուսաստանը կատարում է հիմնական պահանջները, և շատ արևմտյան առաջնորդներ ընդունում են, որ Ռուսաստանը հետաքրքրված է օբյեկտիվ հետաքննության հարցում, կարողացավ ճնշումներ գործադրել այն մարդկանց վրա, ովքեր մալայզիական փորձագետներին փոխանցեցին սև արկղերը: Այսինքն՝ խնդիրը միանշանակ չէ, սպասում ենք, թե ինչպես են զարգանալու իրադարձությունները: Ամեն դեպքում, մենք հասկանում ենք, որ ԱՄՆ-ը չի հանդարտվելու ու հանգստանալու, և նոր պատժամիջոցներ Ռուսաստանի դեմ լինելու են:
Ես ծայրահեղ գնահատականներ չեմ ցանկանում տալ, բայց ակնհայտ է, որ պատժամիջոցների ազդեցությունը վատ է լինելու: Արդեն իսկ մի շարք ռուսական ընկերությունների հաշիվներն արգելափակված են, առաջիկայում իրավիճակն ավելի է լարվելու: Չնայած, իմ համոզմամբ, ռուսական տնտեսության համար այդ պատժամիջոցները մահացու չեն լինելու, բայց բոլորն էլ հասկանում են, որ մեծանում են ծախսերը: Օրինակ՝ կարելի է գումարներ վերցնել ոչ թե ԱՄՆ-ից, այլ Չինաստանից, բայց դա ավելի թանկ ռեսուրս է լինելու»,- ասաց տնտեսագետը՝ շարունակելով, որ պատժամիջոցները չեն կանգնեցնի ռուսական տնտեսությունը, չեն ոչնչացնի այն, քանի որ Իրանի դեպքում այլ էր իրավիճակը, բայց այն, որ ծախսերը մեծանալու են և բարդանալու է տնտեսության վիճակը` միանշանակ է: Ուստի, նրա կարծիքով ևս, հարց է բարձրանում, թե Ռուսաստանի գումարները կբավականացնե՞ն այդ պայմաններում շարունակել եվրասիական ինտեգրացիոն պրոյեկտների զարգացումը, երբ մի կողմից ծախսերը մեծանում են, բայց մյուս կողմից էլ` կա առաջնահերթությունների հարց:
«Ես մտածում եմ, որ ներկայումս հենց հետսովետական տարածքում ինտեգրացիոն պրոյեկտների առաջմղման թեման հանդիսանում է արտաքին քաղաքականության նշանակալի կետերից մեկը, և այս ամենը մեզ ստիպում է ավելի ակտիվորեն գործընկերներ փնտրել հետսովետական տարածքում: Ուստի ես չէի ասի, որ այդ պատժամիջոցները կդադարեցնեն հետսովետական տարածքում տնտեսական ինտեգրացիան»,- ասաց Սիմոնովը:
Վերջինիս համոզմամբ` Ռուսաստանի համար կարևոր է ցույց տալ, որ իրենք այլընտրանք ունեն, ունեն այլընտրանքային գործընկերներ, ուստի հիմա այդ պրոյեկտները չեն սառեցվի, այլ կշարունակվեն ավելի մեծ թափով: