«100 օրն անցել է, և տասը օր է, թե հազար օր է՝ իմ ասելիքը չէ, սա ժողովրդի կողմից ընտրված իշխանություն, կառավարություն և նախագահություն չէ: Մենք դե ֆակտո իրավիճակի մեջ ենք ապրում, և շատ ռոմանտիկ չհնչի, բայց ես չեմ հավատում, որ առանց ժողովրդի վստահության քվեի՝ որևէ մեկը կարող է ներքին կամ արտաքին քաղաքական խնդիրներ լուծել: Կարող է մանր քայլեր լինեն, բայց ես չեմ հավատում. մինչև որ Հայաստանում լինի ժողովրդավարական, սահմանադրական իշխանություն, որևէ ձևով կյանքի որակը կբարելավի»,- «Առաջին լրատվական»-ի հետ զրույցում ասաց «Ժառանգության» առաջնորդ Րաֆֆի Հովհաննիսյանը:
Անդրադառնալով հարցին՝ աշնանը բուռն զարգացումներ, իշխանափոխության հնարավորություն տեսնո՞ւմ է արդյոք, զրուցակիցս նշեց, որ ժամկետային երաշխիք չի կարող տալ, բայց իր ցանկությունն է իր սիրած, պաշտած երկրում համակարգային փոփոխություններ պետք է հնարավորինս շուտ լինեն:
«Ես կուզենայի՝ ամառը լիներ բուռն աշխատանքային, և չսպասեինք կախարդական աշնանը, հետո աշնանը որոշեինք՝ գարնանը, որովհետև հիմքում ընկած է շարքային քաղաքացու և ժողովրդի վստահության խնդիրը»,- ասաց Րաֆֆի Հովհաննիսյանը:
Հարցին ի պատասխան՝ ինչպե՞ս պետք է «հրաշալի քառյալը» վերանվաճի այդ վստահությունը, Րաֆֆի Հովհաննիսյանն ասաց. «Հրաշալի քառյակը ձեր օրիգինալ ստեղծագործությունն է, ես չեմ կարծում, որ հրաշալի է, բայց արդյունավետ գործող խորհրդարանական համագործակցություն է, և այն իսկապես աննախադեպ արժեք է: Եվ աշնանը այդ խաչմերուկն է, որտեղ այդ ուժերը պետք է ցույց տան, ժողովրդին պետք է ներկայացնեն համազգային, համապետական օրակարգը, որ պիտի էապես փոխի երկիրը: Կարծում եմ ՝գոնե ինձ համար աշնանը պիտի հուշի, թե մենք պատրա՞ստ ենք ազգովի կատարել այդ մեծ փոփոխությունը: Բոլոր դեպքերում, խորհրդրաանի պատերի ներսում շատ կարևոր համագործակցություն է, որ մինչև հիմա երբևէ չի եղել: Մենք կողմնակից ենք համատեղ կոնսոլիդացման աշխատանքներին, բայց կողմ ենք՝ ժողովրդին վերադարձնենք իր սահմանադրությունը»,- ասաց նա:
Անդրադառնալով Սերժ Սարգսյանի՝ Բուենոս Այրեսում արած հայտարարությանը, որ հայ ժողովուրդը մտահոգ է ռազմական գործըկերոջ Ռուսաստանի կողմից Ադրբեջանին զենք վաճառելու քաղաքականությամբ, «Ժառանգության» առաջնորդը նշեց՝ ուշ լինի, նուշ լինի. ամիսներ և տարիներ ժողովուրդն անընդհատ նույն բանն է ասում, և հիմա ինքը ուրախ է, որ Սերժ Սարգսյանը հղում է կատարել ժողովրդին: «Ւնքը դա պետք է զգացած լիներ և ասած լիներ վաղուց: Ասաց օտար մայրաքաղաքում, ասաց ուշացած, ասաց փոքր, բայց ասաց: Հիմա հարցն այն է, որ իսկապես մեր ինքնիշխանությունը, սուվերենությունը, ազատությունը, սոցիալ-տնտեսական իրավիճակը դրված է նժարի վրա, և նրա իշխանության օրոք մենք այդ արժեքները հերթով զիջել ենք՝ ժողովրդավարություն, ազատություն, ինքնիշխանություն, ազգային շահ և այլն: Ուրախ եմ, որ ինքը ժողովրդին հղում կատարելով՝ ասում է, որ նման վերաբերմունք կա:
Այո, Ռուսաստանը պետք է լինի ռազմավարական գործընկեր, բայց միևնույն ժամանակ, եթե դու ռազմավարական գործընկեր ես, դու չես վաճառում այն պետությանը, որը ուզում է գրավել մեր երկիրը, Արցախը, այն զենքը, որ նա կարողանա դա անել: Ես չեմ մեղադրում ո՛չ Ռուսաստանին, ո՛չ Թուրքիային. ամեն մեկն ունի իր շահը: Ես կարծում եմ, որ մենք հասել ենք այն սահմանագծին, որ ընդհանրապես պետք է հասկանանք, որ ունենք մեր պետական ազգային շահը: Այդ շահը ոչ թե Բուենոս Այրեսում կամ Մոսվայում է, այդ շահը այստեղ պետք է համակարգվի, պետք է համակարգվի ժողովրդի և քաղաքացիների զորակցության դեպքում, որը հիմա բացակայում է»,- ասաց Րաֆֆի Հովհաննիսյանը:
Նրա դիտարկմամբ՝ ոչ լեգիտիմ այս իշխանությունը թե՛ Արցախի անվտանգության խնդրում, թե՛ հայ-թուրքական արձանագրությունների հարցում և ընդհանրապես շարքային հայաստանցու օտարվածության հարցում իր պետությունից, ամենահերոսական քայլը, որ պետք է անի՝ պետք է հեռանա՝ հիմք ստեղծելով նոր ընտրությունների:
Ավելին՝ տեսանյութում:
