Երևան-Ստեփանակերտ չվերթի վերաբերյալ ադրբեջանական կողմի ագրեսիվ դիրքորոշման մասին այսօր հանդիպման ժամանակ խոսեցին ռազմական փորձագետ Արծրուն Հովհաննիսյանը և քաղաքագետ Հրանտ Մելիք-Շահնազարյանը:
Արծրուն Հովհաննիսյանը նշեց, որ չվերթի հետ կապված Ադրբեջանի հոխորտանքները հերթական՝ հեռուն գնացող սադրանքներն են, և այս ամենը կարելի է որակել որպես պետական ահաբեկչություն: Հովհաննիսյանի գնահատմամբ, Ադրբեջանի քաղաքացիական ավիացիայի վարչական հայտարարությունը, թե իրենք կարող են ռմբակոծել Երևան-Ստեփանակերտ չվերթը իրականացնող ինքնաթիռը, խոսում է այն մասին, որ Ադրբեջանը պետականորեն կարող է ահաբեկչություն իրականացնել ոչ միայն հայերի, այլ նաև այլազգիների նկատմամբ:
Ռազմական փորձագետի խոսքերով, Ադրբեջանի համար դա իրականացնելը տեխնիկապես բարդ է։ Հայաստանի աշխարհագրական դիրքը և տեխնիկական ապահովածությունը ավելի մեծ հնարավորություններ են տալիս ռմբակոծելու Ադրբեջանի տարածքից թռչող քաղաքացիական ինքնաթիռները: Փորձագետը հավելեց, որ հայ ժողովուրդը ոչ մի դեպքում չի ներելու ադրբեջանական կողմի իրականացրած նմանատիպ սադրանքը: