Այսօր Դիլիջան կատարած այցի ժամանակ ՀովիկԱբրահամյանը պատասխանեց հարցին՝ արդյոք Արևմուտքի պատժամիջոցները Ռուսատսանի դեմ կազդե՞ն Հայաստանի տնտեսության վրա, ի՞նչ քայլեր են արվում այս ուղղությամբ, և հնարավո՞ր է արդյոք ԵՏՄ անդամակցության ճանապարհից Հայաստանը հետ կանգնի.
«Անկեղծ ասած, մենք՝ որպես կառավարություն, ամեն ինչ անում ենք, որ նման պատժամիջոցները չազդեն մեր տնտեսության վրա: Մենք մեր գործը պետք է անենք և հնարավորինս ներգրավենք օտարերկյա ներդրումներ Հայաստանի տնտեսությունը զարգացնելու համար»,- ասաց վարչապետը՝ հավելելով, որ Հայաստանի քաղաքացու բարեկեցությունը ուղղակիորեն կապված է մեր տնտեսության զարգացումից:
«Համոզված եմ, որ ով չի հագնում մի այնպիսի ակնոց, որը խանգարում է իրականությունը տեսնելուն, նա տեսնում է, որ բազմաթիվ հարցերի շուրջ կոնկրետ որոշումներ են կայացվում, բոլորը հասկանում են, չէ՞, որ հարյուր օրում մենք չէինք ունենա այնպիսի կախարդական փայտիկ, որ ամեն ինչ պետք է կարգավորեինք, փոխեինք, որ տասնյակ տարիներ աշխատել են, փորձել են վերականգնել, վերակառուցել, ժամանակ է պետք, ռեսուրսներ են պետք, և մենք ունենք քաղաքական կամք»,- հայտարարեց Հովիկ Աբրահամյանը:
«Հնարավո՞ր է՝ «Ռոսնեֆտը» հրաժարվի »Նաիրիտ»-ի ծրագրից» հարցին ի պատասխան վարչապետը նշեց, որ ամեն ինչ հնարավոր է, թեև հավելեց, որ այս պահին չունեն պատասխան, որ հրաժարվելու է.
«էներգետիկայի նախարարը քննարկելու է հարցը, օգոստոսի վերջին կհայտնենք»,- հավելեց նա:
Վարչապետը վրդովվեց այն խոսքից, թե հարկային բեռը դարձյալ փոքր և միջին բիզնեսի ուսերին է: Իր ընդդիմախոսներին էլ ասաց. «Մենք գործով ենք զբաղվում, ոչ թե դատարկաբանությամբ, ինչպես մեր որոշ օպոնենտներ: Եթե կոնկրետ բան ունեն, թող գան ասեն, պատկան մարմինները կապատասխանեն: Մենք խնդիր չունենք որևէ բան կոծկելու, մենք ասում ենք իրականությունը, մենք ավելի շատ խոսելու ենք մեր ապագայի մասին, քան այն, թե ինչ է եղել նախկինում»:
Ավելին՝ տեսանյութում: