Հուլիսի 25-ինն ՀՀ սփյուռքի նախարարության «Սփյուռք» ամառային դպրոցի երիտասարդ առաջնորդների դասընթացի մասնակիցները հանդիպեցին գեներալ-մայոր, Արցախյան ազատամարտի հերոս Արկադի Տեր-Թադևոսյանի հետ: Նա Սփյուռքահայ երիտասարդներին պատմեց Արցախյան պատերազմում հայկական ջոկատների պայքարի, Շուշիի ազատագրության մասին, որը շրջադարձային նշանակություն ունեցավ պայքարի հետագա ընթացքի վրա:
ՀՀ Մարտական խաչի շքանշանակիր Արկադի Տեր-Թադևոսյանը ամառային դպրոցի մասնակիցներին պատմեց, թե ինչպես 1991 թվականի հոկտեմբերին Արցախի նորաստեղծ ինքնապաշտպանական ուժերը թշնամուց ազատագրեցին ռազմավարական կարևորություն ունեցող Տող գյուղը (Հադրութի շրջան), իսկ 1992 թվականի մայիսին փայլուն իրականացվեց Շուշի քաղաքի ազատագրումը, որը համարվում էր ադրբեջանական զորամիավորումների կողմից վերահսկող ամենաանառիկ բարձունքներից մեկը և որտեղից ամիսներ շարունակ ռմբակոծվում էր Ստեփանակերտը։
Ա.Տեր-Թադևոսյանը ներկայացրեց նաև ադրբեջանական հայատյաց քաղաքականության և դրա վնասակար հետևանքների մասին իր նկատառումները:
Հանդիպման ավարտին «Սփյուռք» ամառային դպրոցի երիտասարդ առաջնորդներն իրենց հուզող հարցերը հղեցին Արկադի Տեր-Թադևոսյանին: