Թել Ավիվի համալսարանի Նանոտեխնոլոգիաների և նանոնյութերի հետազոտությունների կենտրոնի և Քիմիայի դպրոցի ինժեներները մշակել են «էլեկտրոնային քիթ», որը պայթուցիկ նյութերի մոլեկուլների նկատմամբ 2-3 անգամ ավելի զգայուն է, քան շան քիթը՝ հայտնում է lenta.ru-ն: Թել Ավիվի համալսարանի հաղորդագրության համաձայն՝ «քիթը» մի քանի հարյուր գերզգայուն սենսորներով չիպ է, որը կարող է օդում հայտնաբերել պայթուցիկի մոլեկուլներ:
«էլեկտրոնային քթի» չիպի վրա կան նանոտրանզիստորներ, որոնք կարող են զգալ պայթուցիկ նյութի նույնիսկ մեկ մոլեկուլի առկայությունը: Թել Ավիվի համալսարանի գնահատմամբ՝ իրենց ստեղծած սարքը սերիական արտադրության դեպքում պայթուցիկի որոնման՝ գոյություն ունեցող համակարգերից ավելի էժան կլինի:
Վտանգավոր նյութերը հայտնաբերվում են իրական ժամանակի ռեժիմում: Միաժամանակ, էլեկտրոնային չիպը կարող է պայթուցիկը տարբերել այլ նյութերից, որոնք այլ թեստերի դեպքում կարող են դրական արդյունք տալ:
Սենսորները կարող են հայտնաբերել նաև ինքնաշեն սարքերը, որոնցում օգտագործվում են ոչ ավանդական պայթուցիկ նյութեր: «Էլեկտրոնային քիթը», ի տարբերություն պայթուցիկի որոնման այլ համակարգերի, կարող է մեծ ճշգրտությամբ տարբերել նյութը: Իսրայելցիների մշակած սարքը կարող է աշխատել նաև հեղուկների հետ: