Թուրքիայի տարբեր քաղաքներում բողոքի ակցիաներ են սկսվել Գազայի հատվածում Իսրայելի ռազմական գործողությունների դեմ: Այս մասին այսօր հայտնել է TRT Haber հեռուստաալիքը:
Հեռուստաալիքի տեղեկությամբ՝ բողոքի ակցիաները սկսվել են ուրբաթօրյա աղոթքից հետո:
Հաղորդվում է, որ բողոքի ակցիաներ կանցկացվեն նաև Ստամբուլում՝ ԱՄՆ հյուպատոսության դիմաց:
Այսօր Թուրքիայի վարչապետ Ռեջեփ Թայիփ Էրդողանը հայտարարել է, որ Թուրքիան չի լռի, երբ Իսրայելը ռազմական ագրեսիա է կատարում պաղեստինցի ժողովրդի նկատմամբ:
Ավելին՝ Էրդողանն Իսրայելի գործողությունները համեմատել է հրեա ժողովրդի նկատմամբ նացիստների գործողությունների հետ: Նրա խոսքով՝ Իսրայելը տարածաշրջանում ահաբեկչություն է տարածում:
Ուրբաթ առավոտյան մոտ 10.000 պաղեստինցիներ Ռամալլահում բողոքի ակցիա են կազմակերպել Գազայի հատվածում Իսրայելի գործողությունների դեմ:
Իսրայելի բանակի զինվորների և պաղեստինցիների բախման հետևանքով 3 մարդ զոհվել է, 30 հոգի՝ վիրավորվել: