Հայաստանի կառավարությունը որոշման նախագիծ է պատրաստում, որ «Հայգազարդ» ընկերության մի շարք ակտիվներ փոխանցի «Որոտանի ՀԷԿՀ» ՓԲԸ-ին: Տվյալ պարագայում այդ ակտիվներն են «Նաիրիտ-2» ՓԲԸ-ի 53,27 տոկոսը և «Նաիրիտ» գործարանի մի քանի տոկոսը: Այդ ակտիվները «Որոտանին» են փոխանցվում «Հայգազարդի» ունեցած պարտքերի փոխարեն: Իսկ «Նաիրիտ-2»-ի մնացած՝ 46,3 տոկոս բաժնեմասը փոխանցվում է կառավարությանը:
Էներգետիկայի նախարարությունից մեզ փոխանցեցին, որ տվյալ գործարքի դեպքում «Նաիրիտ-2»-ի այդ բաժնեմասը «Որոտանին» փոխանցելը չի նշանակում, թե այն ՀԷԿ-երի հետ միասին փոխանցվում է ամերիկյան «Կոնտուր գլոբալ հիդրոկասկադ» ընկերությանը: Ամերիկյան այդ ընկերությունը գնել է ոչ թե «Որոտան» ընկերությունը, այլ ընկերության գույքը՝ ՀԷԿ-երը և ջրամբարները:
«Որոտան» ընկերությունն առայժմ պետական է, և «Նաիրիտ-2»-ի բաժնեմասերը նրան փոխանցվելով՝ շարունակում են մնալ պետական: Իսկ «Նաիրիտ-2»-ը մեզ հայտնի «Նաիրիտ» գործարանը չէ, որը հարյուրավոր միլիոնների հասնող պարտքեր ունի իր գործընկերների և աշխատակիցների նկատմամբ, և որի դեպքում ՀՀ իշխանությունները հույս ունեն ներդրումներ ներգրավել ռուսական «Ռոսնեֆտ» ընկերությունից: «Նաիրիտ-2»-ը գիտահետազոտական ինստիտուտ է և ժամանակին եղել է Չինաստանում «Նաիրիտի» հոսքագծերի տեղափոխողն ու ներդրողը, բայց հետագայում դա էլ փոխանցվեց կառավարությանը:
Ինչ վերաբերում է «Հայգազարդ» ընկերությանը, ապա սա ստեղծվել է 1998թ. 11 ՊՓԲ ընկերությունների միացման արդյունքում: Գազի համակարգի իրական ակտիվները, սակայն, ներդրվել են նոր ստեղծվող «ՀայՌուսգազարդ» ընկերության կանոնադրական կապիտալում, իսկ չհավաքված դեբիտորական և եղած կրեդիտորական պարտքերը փոխանցվել են «Հայգազարդի» հաշվեկշիռ: Եվ կառավարության այս որոշման նախագծով սահմանվում է, որ նշված պարտքերն ու պարտավորությունները մարվելու են ընկերության մի շարք ակտիվներ, այդ թվում` «Նաիրիտ-2» ՓԲԸ-ի 46.73 տոկոս բաժնեմասը ՀՀ կառավարությանը փոխանցելու եղանակով: Փաստորեն, «Որոտանի ՀԷԿՀ» ՓԲԸ հանդեպ «Հայգազարդի» պարտավորությունների մի մասը մարվելու է «Նաիրիտ-2» ՓԲԸ 53.27 տոկոս բաժնեմասը սեփականության իրավունքով փոխանցելու եղանակով:
Ըստ երևույթին, «Որոտանին» ունեցած պարտքը գոյացել է մատակարարած էլեկտրաէներգիայի դիմաց վճարում չկատարելու արդյունքում: Նույնը վերաբերում է նաև «Որոտանին» փոխանցվող արդեն «Նաիրիտ» գործարանի մի քանի տոկոսին: Սա նույնպես մնալու է այդ ընկերության հաշվեկշռում և ՀԷԿ-երի հետ չի փոխանցվի ամերիկյան ընկերությանը ու մնալու է պետական բաժնեմաս:
Սակայն այստեղ կան բազմաթիվ մտահոգիչ հարցեր, որ առայժմ հասու չեն: Որքա՞ն է կազմում «Որոտանին» ունեցած «Հայգազարդի» պարտքը, կամ` ինչո՞ւ չի վճարվել այդ պարտքը: Կառավարությունը «Հայգազարդին» տվել է նաև միջազգային կառույցներից ստացած վարկերից որոշ պարտքեր: Հայտնի չէ, թե ինչ են արվել վարկային այդ գումարները: Կամ` դրանք վճարվե՞լ են, թե՞ ոչ: Էներգետիկայի նախարարության լրատվական ծառայությունից երեկ չկարողացան տալ այս հարցերի պատասխանը:
Իսկ ինչ վերաբերում է Որոտանի ՀԷԿ-երը ամերիկյան «Կոնտուր գլոբալ հիդրոկասկադ» ընկերությանը վաճառելուն, ապա այդ գործարքն էլ դեռ չի ավարտվել: Շրջանառվող տեղեկությունների համաձայն` ՀՀ իշխանությունները փոշմանել են, որ ջրամբարները ՀԷԿ-երի հետ միասին վաճառել են: ՀՀ ջրային օրենսդրության համաձայն` ջրամբարները վաճառքի ենթակա չեն: Եվ հիմա իշխանությունները ցանկանում են ջրամբարները ետ վերադարձնել և դրանք օգտագործման իրավունքով տրամադրել այդ ընկերությանը:
Լուսանկարը՝ Photolure-ի