Իսրայելական պառլամենտարիզմի վետերան և «աջ» ճամբարի առաջնորդներից Ռեուվեն Ռիվլինը ստանձնել է երկրի նախագահի պաշտոնը՝ փոխարինելով Նոբելյան խաղաղության մրցանակակիր Շիմոն Պերեսին, տեղեկացնում է RIA Novosti-ն։
Երդմնակալությունը տեղի է ունենում Երուսաղեմում՝ Կնեսետի շենքում, շուտափույթ ծրագրով։ Ճոխ արարողությունից հրաժարվել է պետության նոր ղեկավարն ինքը՝ համարելով այն ոչ տեղին Գազայի հատվածում գործողության թեժ ժամանակներում, որն ուղեկցվում է զոհերով իսրայելցի զինծառայողների և խաղաղ բնակիչների շրջանում, երկրի խոշորագույն քաղաքաների ամենօրյա գնդակոծումներով։
Ռիվլինը երդում է տվել խորհրդարանական նիստերի դահլիճում իր նախորդի, պատգամավորների, նախարարների, բազմաթիվ հյուրերի ներկայությամբ։ Երկու ռաբիներ փողհարել են շոֆարներ, և Կնեսետի խոսնակ Էդելշտեյնը հռչակել է՝ «Կեցցե՛ Իսրայել պետության նախագահը»։ «Կեցցե՛»,- կրկնել են հավաքվածները։
Ռիվլինը, որի օգտին հունիսյան ընտրություններում քվեարկեց խորհրդարանականների մեծամասնությունը, դարձավ տասներորդ նախագահը Իսրայելի գոյության 66 տարիների ընթացքում։ Ծնունդով Երուսաղեմից, օկուպացված արաբական տարածքներից հեռանալու համոզված հակառակորդ, 74-ամյա Ռիվլինը երկու անգամ դարձել է Կնեսետի խոսնակ և միան մի անգամ է մասնակցել կառավարության աշխատանքին՝ կապի նախարարի պաշտոնում։ 2007 թ. նա առաջին անգամ առաջադրվել է նախագահի պաշտոնում, սակայն զիջել է Պերեսին՝ իր գաղափարական հակոտնյային, պաղեստինցիների հետ խաղաղ գործընթացի ճարտարապետին։