Քիչ առաջ ավարտվեց իշխող Հանրապետական կուսակցության գործադիր մարմնի նիստը: Նիստից հետո ՀՀԿ խոսնակ Էդուարդ Շարմազանովն ասաց, որ քննարկվել են ներկուսակցական և ներքաղաքական հարցեր. «Նոր բան չենք քննարկել»:
Նա անդրադարձավ նաև ՀՀԿ-ական պատգամավոր Շուշան Պետրոսյանի շուրջ ստեղծված աղմուկին և ընդգծեց, որ նա իրենց քաղաքական թիմի ներկայացուցիչն է, իրենց գործընկերը, և լուրերը, թե նրան ստիպում են մանդատը վայր դնել՝ իրականության հետ կապ չունեն:
Ինչ վերաբերում է Արտակ Զաքարյանի և Արտաշես Գեղամյանի իրարամերժ գնահատականներին Ադրբեջանի՝ Մաքսային միությանն անդամագրվելու շուրջ, Էդուարդ Շարմազանովն ասաց. «Ես կարծում եմ, որ իրարամերժ գնահատականներ չեն հնչել, նույն պարոն Գեղամյանն այսօր ներկայացրել է, թե ինչ է նկատի ունեցել Բաքվում: Խնդիրը ոչ թե եղել է ու կա Ադրբեջանի անդամակցությունը Մաքսային կամ Եվրասիական միությանը, այլ խնդիրը ԼՂ անդամակցությունն է այդ միությանը, և միայն այդ դեպքում Ադրբեջանը կարող է անդամակցել Եվրասիական միությանը: Ինչ վերաբերում է Ադրբեջանին, այնուամենայնիվ, այսօր այն շարունակում է ոչ կոնստրուկտիվ գործելաոճը, քարոզում է հակահայկականություն, ռասիզմ, ֆաշիզմ»:
Նա անդրադարձավ նաև Լևոն Տեր-Պետրոսյանի հարցազրույցին և հատկապես այն հատվածին, թե ՀՀԿ-ն, սահմանադրական բարեփոխումներ իրականացնելով, ճնշումներ է գործադրում ԲՀԿ-ի վրա, և ասաց. «Ես ափսոսում եմ, որ այդ հռետորի ասածները հալած յուղի տեղ եք ընդունում։ Գուցե վաղ անցյալում եղել են ճնշումներ՝ Հայաստանի Հանրապետության առաջին տասնամյակի շրջանում, բայց կոնկրետ Հանրապետական կուսակցության կառավարության շրջանում նման բան չկա: Նրա ասածները Կիկոսի մահի ժանրից են»:
Մեր հարցին՝ արդյո՞ք իրականությանը համապատասխանում է Տեր-Պետրոսյանի այն կարծիքը, թե Հայաստանի՝ ԵՏՄ-ին անդամակցությունը հետաձգվում է Հայաստանի և Արցախի միջև անցակետ դնելու խնդրով, նա պատասխանեց. «Նա այն մարդը չէ, որ թելադրում է Հայաստանում քաղաքական օրակարգ: Հայաստանում քաղաքական օրակարգ ձևավորողն ազդեցիկ քաղաքական ուժերն են, իսկ ինքը և իր ղեկավարած քաղաքական ուժը նույնիսկ իրենց դաշնակիցների մոտ ազդեցիկ չեն կարող համարվել»:
Ինչ վերաբերում է կոնկրետ անցակետի խնդրին, ՀՀԿ խոսնակն ասաց. «Որևէ նոր բան չկա, մեր ներկայացուցիչները դրան անդրադարձել են, և ավելացնելու բան չկա: Մաքսային միությանն անդամագրումը մեր շահերից է բխում, և երկրորդը՝ ՀՀ-ն՝ որպես Լեռնային Ղարաբաղի ժողովրդի անվտանգության երաշխավոր, ամեն ինչ անելու է, որ խաղաղ բանակցություններն ավարտվեն, և մենք հասնենք ԼՂ Հանրապետության դե յուրե ճանաչմանը:
Հետաքրքվեցինք նաև, թե հստակություն կա՞ Սարգսյան-Ալիև հանդիպման հետ կապված։ «Եթե լինի հստակություն, ապա համապատասխան պաշտոնյաները Ձեզ կտեղեկացնեն»,- եզրափակեց Շարմազանովը: