Այսօր կառավարության մոտ էր եկել պատգամավոր Կարո Կարապետյանի՝ Յուվեցի Կարոյի փեսայի կրակոցներից Վերնիսաժի տարածքում ծանր վիրավորված Վալերի Հովհաննիսյանի մայրը՝ Լիա Հովհաննիսյանը, հուզված և այլայլված:
Նա պատմեց մանրամասներ. «Որդուս, առանց բժշկի թույլտվության, կիսամեռ վիճակում 1-ին հիվանդանոցից տեղափոխեցին առաջին ատյանի դատարան և չորս ժամ կիսամեռ վիճակում դատ անցկացրին առանց ընդմիջման: Ինչի՞ համար են իմ երեխային ձերբակալել»,- ասաց Լիա Հովհաննիսյանը՝ հավելելով. «Ի՞նչ է, Յուվեցի Կարոն բոլորին գնե՞լ է: Ինչո՞ւ ոչ մի լրատվամիջոց չարձագանքեց, ինչո՞ւ են իմ երեխային ձերբակալել: Իմ երեխան նստած է եղել մեքենայում, մեքենան խոդ է տվել, որ շարժվի, ինքը դուռը բացել է, կրակել երեխայիս վրա: Իմ երեխայի վրա ուժ են գործադրում, ամուսնուս վրա ուժ են գործադրում, որ երեխայիցս վկայություն կորզեն: Յուվեցի Կարոյի ձեռքը շատ երկար է, բոլորին հասնո՞ւմ է, դրա համար էլ իմ երեխային տարել են, որ նրա կեղտերը դնեն երեխայիս վրա: Իմ ընտանիքի վրա ուժ են գործադրում, որպեսզի վկայություն կորզեն: Իմ երեխան վկայություն չի տա, թող չմտածեն դրա մասին»,- հուզված ասաց Վալերիի մայրը՝ հարցադրումով, թե ի՞նչ է լինելու այս անարդարության դեմ:
Նա նշեց, որ որդին հրաշքով է փրկվել:
«Յուվեցի Կարոն ճնշում է գործադրում, որ պտի քո տղան տենց ցուցմունք տա: Ոչ մի բանից չեմ վախենում, մի կյանք ունեմ, մի օր էլ մեռնելու եմ, ես ուզում եմ հասկանալ՝ ինչն է պատճառը, ինչու են տարել որդուս, փակել, Յուվեցի Կարոյի գործն են ուզում սարքեն տղայիս վրա: Ինքը չի հասնելու իր նպատակին, ես մինչև վերջ կգնամ»,- լաց լինելով ասաց կինը՝ ավելացնելով, որ նամակով դիմել է Սերժ Սարգսյանին և հիմա խնդրում է, որ այս գործը նախագահը վերցնի անմիջական հսկողության ներքո:
Մանրամասները՝ տեսանյութում: