Երիտասարդությունը բոլոր ժամանակահատվածներում եղել է հասարակության ամենաակտիվ և հզոր ներուժ ունեցող օղակը, որի համար ինքնադրսևորման լավագույն ձևերից մեկը հասարակական աշխատանքն է, իսկ լավագույն հարթակներից մեկը՝ հասարակական կազմակերպությունը: Այս ոլորտը ոչ միայն ներգրավում է երիտասարդներին՝ կամավորության, հասարակական աշխատանքի միջոցով, այլ նաև ձևավորում և ամրապնդում է նրանց մեջ 21-րդ դարի առաջնորդի լավագույն հատկանիշները, քաղաքացիական գիտակցությունը, տալիս բազում գիտելիքներ ու հմտություններ:
Հուլիսի 20-29-ը Երևանում և Գառնիում Երիտասարդական ակումբների դաշնության (FYCA) նախաձեռնությամբ կանցկացվի «Բացե՛ք դռները» (Open the doors) երիտասարդական փոխանակման ծրագիրը, որին կմասնակցեն ավելի քան 50 երիտասարդներ եվրոպական 11 երկրներից:
Ծրագրի նպատակը հասարակական ոլորտում ակտիվ երիտասարդների համար ՀԿ-ների ղեկավարման և գործունեության որակի բարելավման, աշխատանքի ճիշտ կազմակերպման ու նախաձեռնողականության վերաբերյալ գիտելիքների և փորձի փոխանակման յուրօրինակ հետազոտական հարթակ ստեղծելն է:
«Հատկանշական է, որ ծրագրում օգտագործելու ենք «բաց տարածության» (open space) և “փորձի վրա հիմնված ուսուցման» (experiential learning) մեթոդաբանությունը», – ասաց ԵԱԴ նախագահ և ծրագրի համակարգող Ատոմ Մխիթարյանը:
10-օրյա միջազգային երիտասարդական ծրագիրը հագեցած կլինի ոչ միայն նոր գիտելիքների ձեռքբերմանն ուղղված դասախոսություններով և քննարկումներով, այլ նաև կուղեկցվիարշավներով, սպորտային միջոցառումներով, միջմշակութային երեկոներով:Երիտասարդական փոխանակման ծրագրի ընթացքում մասնակիցները հնարավորություն կունենան սեփական ներդրումն ունենալու Գառնիում ՎԱՐԴԱՎԱՌԻ միջազգային փառատոնի նախապատրաստմանը, կազմակերպմանն ու անցկացմանը, միաժամանակ, առնչվելով հայ մշակույթին ու ազգային ավանդույթներին:
ԵԱԴ լրատվական