Ամերիկյան Apple ընկերության սմարթֆոններն ամենից լավ վաճառվում են Ռուսաստանում, Բրազիլիայում, Հնդկաստանում և Չինաստանում՝ հայտարարել է կորպորացիայի ղեկավար Թիմ Կուկը: Այս մասին փոխանցում է ITAR-TASS-ը:
Նրա խոսքով՝ ընկերությունը 2014-ի երրորդ ֆինանսական եռամսյակում ողջ աշխարհում իրացրել է 35.2 մլն iPhone, ինչը 12.7 տոկոսով ավելի է անցած տարվա նույն ժամանակահատվածի համեմատ:
«Մենք չափազանց գոհ ենք արդյունքներից և նրանից, թե ինչ ուղղությամբ ենք շարժվում»,- ասել է Կուկը:
Նրա խոսքով՝ վերը նշված երկրներում վաճառքն աճել է 55 տոկոսով:
Կուկը նշել է, որ iPad պլանշետային համակարգիչների վաճառքն ընկել է 9 տոկոսով՝ կազմելով 13.2 մլն սարք:
Կորպորացիայի մաքուր շահույթն ավելացել է 11 տոկոսով՝ հասնելով 7.7 մլրդ դոլարի: Հաշվետու ժամանակահատվածում եկամուտը կազմել է 37.4 մլրդ դոլար՝ կրճատվելով մոտ 6 տոկոսով:
Հաշվետվության հրապարակումից հետո ընկերության բաժնետոմսերի արժեքն ընկել է մոտ 1 տոկոսով: Նյու Յորքի բորսայում այժմ մեկ արժեթուղթը կարելի է ձեռք բերել 94.08 դոլարով: