ԵԱՀԿ Մինսկի խմբի ամերիկացի համանախագահ Ջեյմս Ուորլիքը հույս է հայտնել, որ Հայաստանի և Ադրբեջանի նախագահները կընդունեն Փարիզում հանդիպելու Ֆրանսիայի առաջարկը: Այս մասին հայտնում է APA-ն:
«Մենք անհանգստացած ենք Հայաստանի և Ադրբեջանի սահմանին, նաև շփման գծում յուրաքանչյուր կորստով: Մահվան և վնասվածքների հանգեցնող դեպքերի թիվը հետընթաց է կայուն խաղաղության որոնումներում կողմերի հետ աշխատանքի ուղղությամբ մեր ջանքերում: ԱՄՆ-ը և Մինսկի խմբի համանախագահները պատրատ են կողմերին աջակցել Լեռնային Ղարաբաղի հակամարտության խաղաղ կարգավորման որոնումներում: Այն ռազմական լուծում չունի: Համանախագահներն ուզում են Բրյուսելում հանդիպել նախարարներ Էլմար Մամեդյարովի և Էդվարդ Նալբանդյանի հետ՝ քննարկելու հետագա քայլերը»,- APA-ին տված հարցազրույցում ասել է Ուորլիքը:
Նա հավելել է. «Մենք հույս ունենք, որ նախագահները կընդունեն Փարիզում հանդիպելու առաջարկը: Երբ նոյեմբերին նախագահները հանդիպեցին Վիեննայում, մենք վկա դարձանք, որ առաջընթաց հնարավոր է: Մենք հավատում ենք, որ այդ քննարկումների շարունակությունը կարևոր քայլ կլինի դեպի խաղաղություն: Համանախագահները պատրաստ են օգնել ցանկացած միջոցով»:
Լուսանկարը՝ Armenpress-ի
