Հայաստանը ԵՏՄ-ում այլ պարտավորություններ է ունենալու, մենք ԵՄ-ի առջև՝ այլ, ուստի սա անհրաժեշտ բանակցությունների առարկա է: Այս մասին այսօր լրագրողների հետ զրույցում ասաց ՀՀ-ում Ուկրաինայի արտակարգ և լիազոր դեսպան Իվան Կուխտան՝ անդրադառնալով հայ-ուկրաինական հարաբերություններին: Նա նշեց, որ հայ-ուկրաինական հարաբերությունները զարգանում են տարբեր ուղղություններով՝ քաղաքական, տնտեսական, մշակութային, հումանիտար ոլորտներում: Նա անդրադարձավ «Ոսկե ծիրան» ամենամյա փառատոնին, ապա նշեց, որ եթե Փարաջանովը ողջ լիներ, կլիներ Մայդանում կանգնած առաջիններից մեկը:
«Ինչ վերաբերում է տնտեսական ու քաղաքական հարաբերություններին, ապա ես ցանկանում եմ ասել, որ և՛ Ուկրաինան, և՛ Հայաստանը հետաքրքրված են հարաբերությունների խորացմամբ: Մենք հասկանում ենք հիանալի, որ հիմա Հայաստանը միանում է Եվրասիական տնտեսական միությանը, Ուկրաինան ստորագրել է ԱՀ ԵՄ-ի հետ, հիմա մոտ ապագայում կվավերացնի այդ պայմանագիրը, ու, բնականաբար, Հայաստանի և Ուկրաինայի միջև կան որոշակի տնտեսական հարաբերություններ և հետաքրքրություններ: Անցյալ տարի առևտրաշրջանառությունը կազմել է 223 միլիոն դոլար, Ուկրաինան և Հայաստանը հետաքրքրված են երկկողմ ներմուծմամբ ու արտահանմամբ, և քանի որ ԵՏՄ տարիֆները փոխվելու են, բնականաբար, մենք պարտավորություն ենք ստանձնել ԵՄ-ի առջև, կարծում եմ, որ սա անհրաժեշտ բանակցությունների առարկա է: Մենք տարեվերջին հայ-ուկրաինական միջկառավարական հանձնաժողովի նիստ ենք պլանավորում, որի ընթացքում կհստակեցնենք մեր տնտեսական համագործակցության դետալները: Սա շատ կարևոր է»,- նշեց դեսպանը՝ հավաստիացնելով, որ և՛ Ուկրաինան, և՛ Հայաստանը հետաքրքրված են համագործակցության զարգացմամբ:
