Ռուսաստան գյուղմթերքի արտահանման արգելքից մոլդովացի ֆերմերները կկորցնեն ավելի քան 150 մլն դոլար: Այս մասին հայտարարել է հանրապետության գյուղատնտեսության և սննդարդյունաբերության նախարար Վասիլի Բումակովը՝ փոխանցում է ITAR-TASS-ը:
Նախարարի խոսքով՝ դրանք ամենահամեստ հաշվարկներն են: Նա վստահեցրել է, որ կառավարությունը կանի անհրաժեշտ ամեն բան՝ վերադարձնելու մոլդովական արտադրանքը ռուսական շուկա, սակայն ֆերմերներին խորհուրդ է տվել նաև նոր շուկաներ փնտրել, ինչպես արել են մոլդովացի գինեգործները 2006-ին սահմանված ռուսական էմբարգոյից հետո: Բումակովը տեղեկացրել է, որ Մոլդովայի կառավարությունը դիմել է ԵՄ-ին՝ բուսական արտադրանքի մատակարարումների քվոտաները մեծացնելու խնդրանքով:
Փորձագետների կարծիքով՝ արտադրանքը ԵՄ ուղղորդել կարող է տեղի արտադրողների 10-20 տոկոսից ոչ ավելին՝ Եվրոպայում որակի բարձր չափորոշիչների պատճառով:
Մյուսները ստիպված կլինեն իրենց բերքը վաճառել ներքին շուկայում, ինչը կհանգեցնի գների լուրջ անկման: Ամենամեծ կորուստները կկրեն խնձոր արտադրողները, ովքեր եղել են Ռուսաստան այդ մրգի երկրորդ մատակարարը՝ Լեհաստանից հետո: Նրանցից շատերը կառավարությանը սպառնում են բողոքի ակցիաներով, եթե չկարողանան իրացնել իրենց արտադրանքը:
Նշենք, որ արգելքն ուժի մեջ է մտել երեկվանից: