Սամցխե-Ջավախքի և Քվեմո-Քարթլիի Հայկական հասարակական կազմակերպությունների խորհուրդը հաղորդագրություն է տարածել, որում դատապարտում է Թբիլիսիի Էջմիածին եկեղեցու հոգևոր դասի, թեմի պաշտոնեության և հավատացյալների վրա կատարված հարձակումը, Խորհուրդը նաև Վրաստանի իշխանություններին հորդորում է օրենքի ողջ խստությամբ պատժել հարձակումը իրականացնողներին և հանդես գալ պաշտոնական հաղորդագրությամբ: Խորհուրդը կոչ ուղղել նաև միջազգային հանրությանը՝ նկատելով, որ անհրաժեշտ է հետևել ազգային և կրոնական հողի վրա տեղի ունեցած ոճրագործության բացահայտման ընթացքին:
Ստորև ներկայացնում ենք խորհրդի հաղորդագրությունն ամբողջությամբ:
Հուլիսի 19-ի երեկոյան Թբիլիսիի Սուրբ Էջմիածին եկեղեցու բակում, ազգային և կրոնական ատելությամբ դրդված մի խումբ վրացիներ (մոտ 50 հոգի), իրականացրել են ծրագրված հարձակում Թբիլիսիի Սուրբ Էջմիածին եկեղեցու հոգևոր դասի, թեմի պաշտոնեության և հավատացյալների վրա:
Հարձակման ընթացքում տուժել են ինչպես հոգևորականները, այնպես էլ եկեղեցու հավատացյալները: Հարձակման պատճառով մարմնական վնասվածքներ են ստացել եկեղեցու հոգևորականները և Առաջնորդարանի աշխատակիցները:
Սամցխե-Ջավախքի և Քվեմո-Քարթլիի Հայկական հասարակական կազմակերպությունների խորհուրդը դատապարտում է կատարվածը և պահանջում Վրաստանի իշխանություններից օրենքի ողջ խստությամբ պատժել Հայ առաքելական եկեղեցու վրա հարձակված հանցագործներին և տեղի ունեցածի առիթով հանդես գալ պաշտոնական հայտարարությամբ:
Սամցխե-Ջավախք և Քվեմո-Քարթլի տարածաշրջանների հայ հասարակությունը խորապես մտահոգված և վրդովված է տեղի ունեցածով, քանզի բոլորը քաջ գիտակցում են, որ տվյալ հարձակումը տեղի է ունեցել կրոնական և ազգային ատելության հողի վրա, ինչի սերմերը, ցավոք, վաղուց արդեն սերմանվում են վրաց հասարակության մեջ:
Այն, ինչ տեղի է ունեցել Թբիլիսիի Սբ. Էջմիածին եկեղեցու բակում, քայլ է՝ ուղղված Եվրամիությանը մեր երկրի անդամակցության, հասարակական կայունության և պետականության դեմ։ Այդ իսկ պատճառով իշխանությունները պարտավոր են օրենքի ողջ խստությամբ իրական պատասխանատվության ենթարկել հարձակման պատվիրատուներին, կազմակերպիչներին և հարձակումը կատարողներին:
Կոչ ենք անում նաև Վրաստանում գործող բոլոր միջազգային իրավապաշտպան կազմակերպություններին, Վրաստանում հավատարմագրված դիվանագիտական կառույցներին, Եվրոպական դիվանագիտական ներկայացուցչություններին, ուշադրությամբ հետևել ազգային և կրոնական հողի վրա տեղի ունեցած ոճրագործության բացահայտման ու մեղավորների պատժման գործընթացին: