ՀՀԿ-ական պատգամավոր, «Բարեպաշտ սերունդ» հիմնադրամի տնօրեն Վահրամ Մկրտչյանն այսօր վերջապես ներկայացավ դատարան: Նա, հիշեցնենք, անցնում է իր բիզնես գործընկերոջ՝ ԵՊՏՀ դասախոս, գիտությունների թեկնածու Արտակ Ղուկասյանին առևանգելու և ծեծելու, և վերջինիս դեմ հարուցված երկրորդ գործով, որտեղ մեղադրյալի աթոռին հայտնվել է Արտակ Ղուկասյանը:
Հիշեցնենք, որ Վահրամ Մկրտչյանն ու Արտակ Ղուկասյանը համատեղ բիզնես են ունեցել՝ տարադրամի փոխանակման կետեր և գրավատներ: Պայմանավորվածությունն այնպիսին է եղել, որ գործի համար հիմնական ներդրում պետք է աներ Վահրամ Մկրտչյանը, իսկ Արտակը պետք է աշխատեցներ կետերը: Հետագայում ինչ-ինչ խնդիրներ էին առաջացել, որոնք հանգեցրել էին հենց այս կոնֆլիկտին: Վահրամ Մկրտչյանն իր սանիկի՝ պետական եկամուտների կոմիտեի ՕՀՎ բաժնի պետ Արման Սարգսյանի, վերջինիս եղբոր՝ Գուրգեն Սարգսյանի հետ անցած տարվա մայիս ամսին առևանգել էր Արտակ Ղուկասյանին, տարել Եղվարդ, ծեծի ենթարկել, ապա մի քանի օրվա մեջ նրանից խլել ողջ ունեցվածքը՝ նրա կնոջ ու ծնողների ոսկեղենը, ապա բիզնեսները, տարածքները, տան գույքը և այլ ունեցվածքը:
Այսօր դատարանում Վահրամ Մկրտչյանը առևանգմանն ու ծեծին չանդրադարձավ: Նա պատմեց, որ համատեղ բիզնես սկսելուց հետո, ինչպես պայմանավորվել էին, ինքը ներդրել է 80 միլիոն դրամ 2 գրավատուն և տարադրամի փոխանակման 6 կետեր աշխատեցնելու համար: Ապա սիստեմատիկ ստացել է իր եկամուտը, երբեմն էլ անցել և ստուգումներ է իրականացրել: Բայց մի պահից, երբ Արտակը սկսել է 70 հազար դոլարանոց մեքենա քշել, իր մոտ կասկածներ են առաջացել, որ Արտակն իրեն խաբում է: «Ես չհասկացա, թե ինչու ես, որ հիմնական սեփականատերն եմ, պետք է 10 հազար դոլարանոց մեքենա քշեի, իսկ Արտակը՝ 70: Դրանից հետո մոտս կասկածներ առաջացան, և ես սկսեցի ստուգել»,- իր ցուցմունքի ժամանակ ասաց պատգամավորը: Ապա նա մանրամասն պատմեց, թե ինչպես են իր մոտ այլ կասկածներ առաջացել, ինչպես է պարզել, որ գրավատների պահոցներում չկան իր ներդրած գումարները, ոսկեղենը, ինչպես է Արտակը խուսափել իր զանգերից և այլն: Կամ ինչպես է պարզել, որ Արտակը տարադրամի փոխանակման կետերից մեկը վաճառել է այլ անձի, երբ ինքը ոչ ոքի երբեք չի լիազորել իր փոխարեն որևէ փաստաթղթի տակ ստորագրել:
Վահրամ Մկրտչյանը պատմեց նաև Արտակին Եղվարդ տանելու մասին, բայց բոլորովին այլ գույներով: Նրա խոսքով, իրենք գնացել են Եղվարդ, քանի որ այնտեղ մարդիկ կային, ում Արտակը փող էր պարտք: Գնացել են, նստել են սեղանի շուրջ, զրուցել ու հաշվարկներ են արել, որից հետո ինքը Վաչե Սարգսյանի հետ, առանց Արտակի, որոշել է գալ Արտակենց տուն: Երեկոյան ուշ եկել են, նրանց դիմավորել է Արտակի հայրը, ապա երբ խոսել են պարտքերից, Արտակի հայրը, ապա մայրը բերել են իրենց ոսկիները և ինքնակամ տվել են Վահրամին՝ հաշվի առնելով այն փաստը, որ Արտակը պարտք է եղել իրեն:
Այս ցուցմունքը, սակայն, զայրացրեց Արտակի հարազատներին: Դատական նիստից հետո վեճ սկսվեց նրանց և Վահրամ Մկրտչյանի միջև: Արտակի կինը՝ Գոհարը, պնդեց, որ Վահրամն ու իր շքախումբը գիշերով իրենց տուն են եկել և ոսկիները տարել են ստիպողաբար՝ սպառնալով, որ եթե չտան, ամուսնուն այլևս չեն տեսնի: «Էդ որ հիմարը իր ոսկին ինքնակամ կտար ուրիշին: Առանց վախեցնելու, ով իր ոսկին կտար Վահրամին: Ինքն ասաց՝ եթե ոսկին չտաս, ամուսինդ չի գա տուն այլևս: Իսկ իինձ համար իմ ամուսնու կյանքն ավելի թանկ էր, քան էդ երկու կտոր ոսկին, որը ես շպրտեցի նրա երեսին»,- ասաց Գոհարը:
Վահրամ Մկրտչյանի հարցաքննությունն այսօր կիսատ մնաց, թեև դատավորն այն ավարտված համարեց: Դատավորը ցանկանում էր, չնայած աշխատանքային օրվա ավարտին, շարունակել պատգամավորի հարցաքննությունը, իսկ տուժող կողմի պաշտպանը հրաժարվեց հարցեր տալուց՝ համարելով, որ աշխատանքային օրն ավարտվել է: Դատավորը հարցաքննությունն ավարտված համարեց և հաջորդ նիստը նշանակեց հուլիսի 31-ին:
Վահրամ Մկրտչյանը դատարանից հեռացավ շատ արագ իրեն ուղեկցող մի քանի անձանց հետ, որոնցից մեկն անընդհատ փորձում էր պաշտպանել պատգամավորին՝ հայտարարելով, որ շուտով ամեն ինչ կպարզվի, ու «փողերը մի տեղից դուրս կգան»: Ի դեպ, դատարանում նրա ցուցմունքի ժամանակ պարբերաբար խոսք էր գնում բավական մեծ գումարների մասին, բիզնեսների, տների, առանձնատների մասին, որոնք պատկանում էին պատգամավորին, սակայն դատավորը հանեց տուժող կողմի պաշտպանի հարցը, թե որտեղի՞ց նրան այդ եկամուտները:
Նշենք, որ Արտակի հարազատների խոսքերով՝ և՛ Վահրամ Մկրտչյանը, և՛ նրա սանիկները, ովքեր ՊԵԿ-ի աշխատողներն են, բոլորն էլ տոկոսով փող տվող են:
