Ճապոնիայի տեխնոլոգիական ինստիտուտի մասնագետները մշակել են վիրահատությունների տեսագրության նոր տեխնոլոգիա, որը թույլ է տալիս կադրից հեռացնել այն իրերը, որոնք խանգարում են հետևել վիրահատության գործընթացին: Այս մասին հաղորդում է ITAR-TASS-ը:
Մեթոդը հիմնված է մի քանի տեսախցիկների կիրառման վրա, որոնք տեղակայվում են վիրահատարանի տարբեր հատվածներում, ինչպես նաև մի փոքրիկ տեսախցիկ՝ վիրաբույժի ակնոցի վրա: Այն բանից հետո, երբ բոլոր տեսանյութերը համատեղվում են, ստեղծված տեսանյութից հեռացնում են պինցետների, վիրաբուժական դանակների և այլ իրերի, ինչպես նաև բժշկի ձեռքերի պատկերները: Բացի այդ, պատկերը հնարավոր է դարձնել եռաչափ և դրանից հետո շրջել ցանկացած անկյունի տակ: Արդյունքում հստակորեն երևում է վիրահատության այս կամ այն փուլը:
Այս տեխնոլոգիան կիրառվում է բժշկական համալսարանի ուսանողների ուսուցանման համար: