«Առաջին լրատվական»-ի զրուցակիցն է Քաղաքական և միջազգային հետազոտությունների կենտրոնի ղեկավար, քաղաքագետ Աղասի Ենոքյանը:
–Պարոն Ենոքյան, Հայաստանի Եվրասիական տնտեսական միությանը միանալու ժամկետն անընդհատ հետաձգվում է: Սկզբում նշում էին, թե այդ փաստաթուղթըկստորագրվի հուլիսի 1-ին, ապա՝3-ին, բոլորովին վերջերս պարզ դարձավ, որ այն կստորագրվի հոկտեմբերի վերջին: ՀՀ առաջին նախագահն այսօր իր հարցազրույցում անդրադարձել է դրան և նշել, որ խնդիրը վերաբերում է Հայաստանի և Արցախի միջև մաքսակետ տեղադրել-չտեղադրելուն: Ի՞նչ եք Դուք կարծում:
–Ես կարծում եմ, որ Մաքսային միության հետ կապված ինչ-որ կախարդանքներ կան, որովհետև ինչպես մենք չենք հասկանում, թե ինչու ենք մտնում Մաքսային միություն, այնպես էլ չենք հասկանում, թե ինչու չենք մտնում:Ես չեմ կարծում, որ իրատեսական է Հայաստանի անդամակցումն այդ միությանը նույնիսկ հոկտեմբեր ամսին:Բազմաթիվ խնդիրներ ու ենթադրություններ կան ձգձգման իրական պատճառների մասին:Դրանցից մեկն էլ այդ մաքսակետն է: Համենայնդեպս, Մաքսային միության հետ կապված ինչ հնչեցվում է, պարզվում է՝ իրականությունն այլ է:
Ռուսաստանը, օգտագործելով Հայաստանի առկախված կարգավիճակը, փորձում է ազդել Ադրբեջանի վրա և որոշակի լուծումներ առաջարկել հօգուտ Ադրբեջանի: Ձեր նշած մաքսակետը կարող է լինել այդ լուծումներից մեկը.դա Ռուսաստանի համար միջանկյալ լուծում կլինի, որովհետև նրա հիմնական խնդիրն այնտեղ խաղաղապահներ կամ ընդհանրապես՝ որևէ զորք տեղակայելն է: Կան նաև պատճառներ, որոնք կախված են Բելառուսի ու Ղազախստանի շահերից: Նրանք տեսնում են Հայաստանի վարած քաղաքականությունը և հասկանում՝ եթե Հայաստանը դառնա այդ միության անդամ, Ռուսաստանն այնտեղ կունենա երկու հստակ ձայն:
–Ռուսաստանի դեմ պատրաստվում է պատժամիջոցների նոր փաթեթ, որո՞նք կարող են լինել դրանց հնարավոր հետևանքները:Հնարավո՞ր է՝ Ռուսաստանը դրանից է՛լ ավելի ագրեսիվանա այն պետությունների հանդեպ, ուր նրա ձեռքերը հասնում են՝ Հայաստան, գուցե նաև՝ Վրաստան:
–Հնարավոր է: Իմ խորին համոզմամբ՝ Ուկրաինայի պատերազմը լրջագույն PR ակցիա է Պուտինի համար՝ իր քաղաքացիներին ցույց տալու, որ իրենք հզոր են, իրենք վերականգնում են նախկին Խորհրդային Միությունը, և եթե այս պատժամիջոցների հետևանքով ստիպված լինի կանգնեցնել իր առաջխաղացումն Ուկրաինայում, ավելին՝ հետ քաշել իր զորքերը, ապա բնական է, որ նա իր ժողովրդին պետք է ցույց տա այլ տեղ, որտեղ իրենք հզոր են: Այդ առումով չեն բացառվում Վրաստանի, նաև Հայաստանի հանդեպ նոր գործողություններ:
Հարցազրույցն ամբողջությամբ՝ տեսանյութում:
