Ամռան շրջանում վարակների առաջացման պատճառները բազմաթիվ են և հանդիպում են ամեն քայլափոխի: Հուլիսի 21-ին լրագրողների հետ հանդիպմանը առողջապահության նախարարության հիվանդությունների վերահսկման և կանխարգելման ազգային կենտրոնի ներկայացուցիչ Լիանա Թորոսյանը նշեց, թե պատճառներից մեկը մեր՝ հայերիս սովորությունն է՝ սնունդը ոչ լավ լվանալ:
Լ.Թորոսյանի խոսքով՝ աղիքային վարակիչ հիվանդությունները սեզոնայնություն ունեն. ոչ ոք ապահովագրված չէ ասելու, որ իր շրջակա միջավայրը ստերիլ է, և իրենք չեն կարող փոխանցման գործոն դառնալ: ԱՆ մասնագետը խորհուրդ է տալիս պտուղ-բանջարեղենը լվանալ հոսող ջրի տակ, հատկապես եթե դա հողի հետ ավելի կապ ունի, խուսափել կրեմային հրուշակեղենից, արագ պատրաստվող սննդից: Նրա խոսքով՝ տաք պայմաններում, երբեմն՝ ոչ պատշաճ սառնարանային պայմաններում, պահպանված սննդամթերքը կարող է վտանգավոր լինել:
Կաթնամթերքը ևս վարակի հարուցիչներից է: «Մի մոռացեք, որ թարմ կաթը կարող է պարունակել այն հարուցիչները, որոնցով կարելի է հիվանդանալ: Անտառ գնալիս պետք է հագնել երկարաթև հագուստ, երկար տաբատ, երկարաճիտ թեթև կոշիկներ, որ փոքրիկ հոդվածոտանիները չկարողանան իրենց չարաբաստիկ գործն անել:
Բոլոր վարակիչ հիվանդությունների դեպքում ինքնաբուժության դիմել չի կարելի. բոլորս բժիշկ ենք դառնում, բայց չմոռանանք, որ վարակի ախտանիշերի պայմաններում ինքնանշանակում ենք անում, հակաբիոտիկներ նշանակում, որ այդ պահին գուցե ինչ-որ չափով օգուտ տա, սակայն հետագայում այլ հետևանքներ կարող են լինել»,- ասաց նա:
Մասնագետը հորդորում է պատահական վայրերից սունկ չհավաքել և չօգտագործել սննդամթերքում: Նրա խոսքով՝ եթե որևէ խնդիր առաջանում է արդեն իսկ որևէ տնտեսվարողից գնած մթերքից, նախարարությունը կարող է իմանալ՝ որ առևտրի կետից է այն գնված:
Ջուրը նույնպես վարակի հարուցիչ է: Թորոսյանը նշում է՝ բոլորս փողոցներում տեսնում ենք դեկորատիվ լողավազաններ, չի կարելի դրանցից օգտվել. շրջապատում կան թափառող կենդանիներ, որ նույնպես շոգում են, մտնում են լողանալու, պատկերացնել կարելի է՝ որքանով է վտանգավոր դա: Ու թեև լողավազանները նախարարության կողմից պարբերաբար ստուգվում են, սակայն պետք է հետամուտ լինել՝ երեխաները չօգտվեն դրանցից:
«Պատահական աղբյուրներից չի կարելի ջուր խմել, պետք է մեզ հետ ունենալ շշալցված ջուր, որ հետազոտված է կամ բնակարանի ծորակից է: Համաճարակային իրավիճակը վարակիչ հիվանդությունների առումով համեմատաբար հանգիստ է, միայն էնտերովիրուսային վարակներով պայմանավորված աշխուժացում կա, որևէ ահազանգի հիմքեր չկան. այս հիվանդությունները եղել են, կան, ուղղակի մեր լաբորատոր կարողություններն ավելի բարելավվել են»,- ասաց նա:
Լուսանկարը՝ Panorama.am-ի
