Երեկ Հայ Առաքելական Ուղղափառ Սուրբ Եկեղեցու վիրահայոց թեմը հայտարարություն տարածեց, որ Թբիլիսիի Սուրբ Էջմիածին եկեղեցու բակում, ազգային և կրոնական ատելությամբ դրդված, իրականացվել է ծրագրված հարձակում Թբիլիսիի Սուրբ Էջմիածին եկեղեցու հոգևոր դասի, թեմի պաշտոնեության և հավատացյալների վրա:
«Բազմազգ Վրաստան» քաղաքացիական շարժման նախագահ Առնոլդ Ստեփանյանն «Առաջին լրատվական»-ի հետ զրույցում նշեց, որ հարձակում տեղի չի ունեցել, և չի կարելի կատարվածը դիտարկել որպես ազգային հողի վրա կատարված հանցագործություն: Նրա խոսքով՝ եղել է հարձակում երեք հոգու վրա՝ Տեր Մանուկ քահանա Զեյնալյանի, թեմի իրավական հարցերով և համագործակցության բաժնի տնօրեն Լևոն Իսախանյանի և նրա եղբոր՝ տնտեսվար Ռոբերտ Իսախանյանի վրա:
Նա նշեց, որ վեճը ծագել է այն բանից, որ մի կին որոշել է մեքենան կայանել հայկական եկեղեցու դարպասի մոտ՝ այն ժամանակ, երբ քաղաքացիական հագուստով հայ հոգևորականներից մեկը նույն պահին եկել է նույն տեղում կայանելու: Կինը հարցրել է՝ ինչո՞ւ եք այդտեղ կայանում, ես էի պատրաստվում կայանել, ինչին ի պատասխան՝ հոգևորականը կոպիտ է արտահայտվել: Միջամտել է կնոջ ամուսինը: Երկու կողմից էլ հնչել են հայհոյանքներ, որից հետո մոտեցել են հայկական եկեղեցու երեք ներկայացուցիչներ, և սկսվել է ծեծկռտուքը:
«Երկկողմանի ակտիվ հայհոյանքներ էին. ոչ մի հոգևորականի պատիվ չէ օգտագործել նման հայհոյանքներ, նման բառապաշար»,- ասաց Առնոլդ Ստեփանյանը՝ հավելելով, որ խնդիրը կարգավորելու համար այլ մեթոդներ պետք է կիրառվեին:
Առնոլդ Ստեփանյանը նշեց, որ քրեական գործ է հարուցվել, քննվում են երկու կողմերն էլ:
Նա նաև նշեց, որ լուրջ վնասվածքներ է ստացել Լևոն Իսախանյանը:
Առնոլդ Ստեփանյանը զրուցել է երկու կողմերի հետ էլ: Կողմերից մեկը մեկնաբանել է, որ կոնկրետ եկել էին Իսախանյանին ծեծելու. «Առավելագույնը 20 հոգի են եկել եկեղեցի, ոչ թե հիսուն»,- ասաց նա:
Եկեղեցու աշխատոողներից մեկը սկսել է օդ կրակել, բացի այդ՝ հայկական եկեղեցու բակ ոչ մեկը չի մտել, հակահայկական որևէ միտք չի հնչել, ոչ մի խոսք:
«Այս տիպի սցենարները հաստատ ոչ Հայաստանին, ոչ Վրաստանին են պետք, իսկ թե ում են պետք՝ կարող եք ենթադրել»,- ասաց Առնոլդ Ստեփանյանը՝ պատասխանելով մեր հարցին՝ սա ձեռնտո՞ւ էր Ռուսաստանին: