Ռուսաստանը չի կարող անվտանգության երաշխավոր լինել ոչ մի երկրի, այդ թվում՝ Հայաստանի համար: «Առաջին լրատվական»-ի հետ զրույցում այս մասին ասաց թբիլիսյան Black Sea Press գործակալության գլխավոր խմբագիր, քաղաքագետ Գելա Վասաձեն՝ անդրադառնալով Ուկրաինայի հարավ-արևելքում մալայզիական ինքնաթիռի կործանման փաստին ու Ռուսաստանի տրամադրած անվտանգության երաշխիքների արժեքին:
Նա նշեց, որ Ռուսաստանը անվտանգության վատ երաշխավոր է. այս մի քանի տարիների ընթացքում ՀՀ իշխանությունների բոլոր փորձերն ազատվել ռուսական ազդեցությունից, արժանանում էին Մոսկվայի դիմադրությանը, այսօր բավականին բարդ իրավիճակ է առաջացել, պուտինյան ռեժիմը բնականորեն հայտնվել է շատ անկայուն դրության մեջ: Ըստ նրա՝ Արևմուտքում հիանալի հասկանում են, որ Ուկրաինայի արևելքում անջատողականներ չկան, այնտեղ ընթանում է ռուս-ուկրաինական պատերազմ, և ռուսական զորքերն օկուպացրել են Ուկրաինայի տարածքի մի մեծ հատվածը, իսկ հիմա կործանել են մալայզիական ավիաընկերությանը պատկանող ինքնաթիռը:
«Պուտինն, ըստ էության, փրկվելու հնարավորություն ունի, եթե ռուսական զինված ուժերի ներկայացուցիչները չշարունակեն Ուկրաինայի օկուպացիան, եթե շարունակեն, ապա կունենան միայն կարճաժամկետ հաղթանակ, իսկ երկարաժամկետ հեռանկարում դա վատ ավարտ է ունենալու Ռուսաստանի համար: Ռուսաստանն ինքը եվրոպական երկիր է, Ռուսաստանը չի կարող լինել Չինաստանի հետ, Բրազիլիայի հետ, Ռուսաստանը պետք է լինի Եվրոպայի հետ՝ այնպես, ինչպես Վրաստանն ու Հայաստանը, իսկ որպեսզի Պուտինը պահպանի իր համակարգը, դիմադրություն է ստեղծում և նման խնդիրներ, քանի որ եվրոպական համակարգում այդ համակարգը պահպանել հնարավոր չէ: Ուստի կարելի է ենթադրել, որ կարճաժամկետ ապագայում Ռուսաստանը կմնա երաշխավոր, բայց ամեն դեպքում կարծում եմ, որ այս ամենից հետո Եվրոպան թույլ չի տա լայնածավալ ռազմական գործողություններ Կովկասում: Արևմուտքի շահերից է բխում, որ բոլոր կողմերը համաձայնության գան, և զարգանան բնականոն հարաբերություններ»,- ասաց Գելա Վասաձեն:
Վրացի քաղաքագետն անդրադառնալով Կովկասում լարվածության օջախների ակտիվացմանն ու մասնավորապես Ջավախքում հնարավոր նոր զարգացումներին՝ ասաց, որ Ջավախքում լարվածություն չի սպասում, քանի որ Ռուսաստանը Վրաստանի վերաբերյալ օգտագործել է արդեն բոլոր հնարավորությունները, հարցն այն է, որ Ջավախքում իմաստուն մարդիկ են ապրում և հիանալի հասկանում են, որ Հայաստան-Վրաստան հարաբերությունների շարունակականությունը տարածաշրջանում կայունության գրավականն է: «Ես չեմ կարծում, որ Ռուսաստանին այսօր կհաջողվի որևէ լարվածություն ստեղծել Ջավախքի միջոցով»,- ասաց նա:
Խոսելով օրեր առաջ ԱՄՆ Կոնգրեսում ընդունված երկու բանաձևերից, որոնցով Վրաստանին տրվում է ԱՄՆ գործընկերոջ կարգավիճակ ՆԱՏՕ-ի անդամակցության հեռանկարի տրամադրման փոխարեն՝ ասաց, թե սա ենթադրում է, որ ԱՄՆ-ն կդառնա Վրաստանի անվտանգության երաշխավորը, սակայն պետք չէ սպասել, որ Վրաստանում ամերիկյան ռազմական բազաներ կտեղակայվեն, քանի որ դրա անհրաժեշտությունը չկա: «Բայց կասեմ ավելին՝ եթե այդ օրենքներն ընդունվեին 2008թ., տեղի չէր ունենա ո՛չ օգոստոսյան պատերազմը, ո՛չ էլ Ուկրաինայի ներկայիս պատերազմը: Նրանք այդ օրենքի ընդունման հարցում 8-10 տարով ուշացել են: Բայց ինչպես ասում են՝ ավելի լավ է ուշ, քան երբեք: Արևմուտքի համար պատերազմը երբեք չի դառնում խնդիրների լուծման փաստարկ, ուստի հաշվի առնել, որ մենք վաղը կդառնանք ԱՄՆ գործընկերը, իսկ մյուս օրը կվերադարձնենք Աբխազիան ու Հարավային Օսիան, ապա դա հիմարություն է: Այստեղ սա գործելու է պուտինյան Ռուսաստանի դեպքում: Խոսքն այն մասին է, որ լինելու են անվտանգության երաշխիքներ, լինելու են զարգացման երաշխիքներ: Սակայն այս ամենը չի կարող հավասարակշռել տարածաշրջանում Ռուսաստանի և Ամերիկայի ներկայությունը, քանի որ Ռուսաստանի պրոպագանդան չափազանց խորն ու հիմնովին է: Արևմուտքը աշխատելու մեծ տեղ ունի»,- ասաց վրաստանցի վերլուծաբանը: