Ոսկեվազցի պապիկը՝ Վազգեն Թադևոսյանը, առանց հուզվելու չէր կարողանում խոսել իրենց գյուղի բնակիչ՝ 20-ամյա զինծառայող Գևորգ Ավագյանի մասին:
«Երաժշտական ինստիտուտ է ընդունվել իր ուժերով: Այնքան խելոք, աշխատող, քյասիբ… Հերը շինարարությունում է աշխատում, օրվա հացի կարոտ են, մերն էլ փոքր երեխայի հետ տուրբազայում է աշխատում: Բան չունեն, տուն էլ չունեն, քյասիբ են: Խելացի երեխա էր, իր ուժերով ընդունվել էր ինստիտուտ: Ամբողջ գյուղով լաց են ըլնում իր համար: Ասում են՝ էդ շան որդին Ստեփանավանից է: Դագաղը բերել են, բայց փակ վիճակում, երկու հոգի էլ հիվանդանոցում են պառկած՝ վիրավոր են, նույն տեղում են եղել: Շատ խելոք տղա էր, տենց տղա չկա մեր գյուղում, երեք ամսից ավարտում էր գար… երեք ամիս»,- ասաց Վազգեն պապը հեկեկալով:
Գևորգի դասընկերը՝ Անդրանիկը, «Առաջին լրատվական»-ի հետ զրույցում նշեց, որ մեկ ամիս առաջ էր Գևորգը եկել «օտպուսկ», ծառայությունից գոհ էր, ընկերոջն էլ ասել է՝ ամեն ինչ անելու եմ նորմալ պրծնեմ գամ:
Նա պատմեց, որ ընկերը թեև մինչև ծառայությունը ժամանակ ուներ, բայց ինքնակամ գրվեց, գնաց բանակ, քանի որ չէր ուզում սովորեր վերջացներ նոր գնար, չէր ուզում իրենից փոքրերի հետ ծառայեր:
Հարևանները նշեցին, որ Ավագյանները տուն էլ չունեն, ծածկ էլ չունեն: «Հարուստ երեխեքից փողն առնում են՝ քյասիբի երեխեքին ուղարկում ծառայության»,- հուզված նշեցին հարևանները: Ծեր թե մանուկ՝ բոլորը լաց էին լինում:
Մշակույթի տանը Գևորգի հոգեհանգիստն էր, սակայն շատ հեռվից անգամ լսվում էր նրա մոր և տատի աղեկտուր լացը: «Եթե թուրքի գնդակից լիներ, կասեինք՝ հա, բայց հայը հային սպանի՞»,- արցունքների միջից ասում էին նրանք:
Հիշեցնենք, որ Գևորգ Ավագյանը սպանվել է ծառայակցի կողմից արձակված կրակոցից: Հարուցվել է քրեական գործ՝ Քրեական օրենսգրքի 104 հոդվածի 1-ին մասով՝ սպանություն: Քրեական գործի շրջանակներում ձերբակալվել է Գևորգ Ավագյանի ծառայակիցը՝ Արմեն Սարգսյանը, սպանությունը կատարելու կասկածանքով:
Ավելին՝ տեսանյութում: