Ոսկեվազ գյուղում սուգ է: Երեկ վաղ առավոտյան ՊԲ հարավային ուղղությամբ տեղակայված զորամասերից մեկի պահպանության տեղամասի մարտական հենակետերից մեկում մահացու հրազենային վիրավորում ստացած զինծառայող, 1994թ. ծնված Գևորգ Ավագյանի հոգեհանգիստն է գյուղի Մշակույթի տանը: Իրենց տանը չէին կարող կատարել, քանի որ Գևորգ Ավագյանի ընտանիքն ապրում է սոցիալական ծանր պայմաններում՝ գյուղի ծայրում փոքրիկ և առանց ծածկի տանը. տան տանիքը մեծ «ցելոֆաններով է պատված»:
«Զինվոր» համակարգող խորհրդի նախագահ Մարգարիտա Խաչատրյանը նույնպես մասնակցում էր հոգեհանգստին: «Առաջին լրատվական»-ի հետ զրույցում նա նշեց, որ վաղ առավոտից եղել է դիահերձարանում, շատ վատ է զգում, ուստի չի կարող խոսել: Այնուամենայնիվ, նա նշեց, որ Գևորգ Ավագյանը չորս ամիս հետո զորացրվելու էր. «Մեր զոհվածի՝ Հասմիկի թոռնիկն է, էսօր իմ շահառուի կողքին եմ կանգնել, վիշտն եմ սգում և ցավում եմ, որ մի մամա էլ «բալա» կանչեց»,- ասաց նա:
Հետաքրքրվեցինք՝ ինչպե՞ս է դեպքը տեղի ունեցել: Մարգարիտա Խաչատրյանի խոսքով՝ թե ինչպես է տեղի ունեցել դեպքը և թե որն է եղել պատճառը՝ ոչ ոք չի կարող իմանալ, քանի որ դեպքը տեղի է ունեցել դիրքերում:
Մեր հարցին, թե տեղեկատվությունը, ըստ որի՝ զինծառայակից ընկերը՝ Արմեն Սարգսյանը, ամբողջ պահունակը կրակել է Գևորգի ուղղությամբ, որքանո՞վ է համապատասխանում իրականությանը, նա պատասխանեց. «Դատաբժշկական փորձաքննություն կա, ես մայրաբար գոռում էի՝ բալես, և հնարավոր չէր մինչև վերջ մասնակցել»:
Ոսկեվազի դպրոցի հայոց լեզվի և գրականության ուսուցչուհին, տեսնելով զինվորական և հրամանատարական անձնակազմին, ասաց. «Չեն էլ ամաչում՝ եկել կանգնել են այստեղ, ի՞նչ երեսով, որ լավ զինվո՞ր են տվել, որ բժշկական կամիսիայով լավ անցկացրե՞լ են: Իմ սանն է եղել ու շատ լավ երեխա էր: Դրա փոխարեն՝ գնացեք էդ կանգնածներին ասեք՝ շատ ապրեք, լավ հայրենիքի պաշտպան եք. անամոթնե՛ր, երանի իրենք լինեին, իրենք լինեին այս արկղի մեջ, որ իմանային»,- ասաց մանկավարժը՝ հավելելով, որ Գևորգը շնորհված էր մարդկային բոլոր լավ կողմերով, բարեխիղճ էր:
Ի դեպ, հոգեհանգիստը տեղի ունեցավ փակ դագաղով, քանի որ ոսկեվազցիների պատմելով՝ ամբողջ դեմքի վրա տեղ չի մնացել:
ՀՀ ԶՈւ Գլխավոր շտաբի պետի տեղակալ, գեներալ-մայոր Լյովա Մնացականյանը չցանկացավ որևէ բան մանրամասնել կատարվածից, միայն նշեց, որ նախաքննություն է գնում, և այս փուլում իրավունք չունեն մեկնաբանելու:
Հիշեցնենք, որ Գևորգ Ավագյանը սպանվել է ծառայակցի կողմից արձակված կրակոցից: Հարուցվել է քրեական գործ՝ Քրեական օրենսգրքի 104 հոդվածի 1-ին մասով՝ սպանություն: Քրեական գործի շրջանակներում ձերբակալվել է Գևորգ Ավագյանի ծառայակիցը՝ Արմեն Սարգսյանը, սպանությունը կատարելու կասկածանքով:
Ի դեպ, հոգեհանգստի ողջ ընթացքում ոմն Վոլոդյա խոչընդոտում էր «Առաջին լրատվական»-ի աշխատանքին, հրում էր լրագրողին, սպառնում: Ոսկեվազի բնակիչները պատմեցին, որ Վոլոդյան Ոսկեվազից չէ, Գևորգի հոր՝Արծրունի մորաքրոջ տղան է, ում որդին՝ Աշոտը, ՊՆ-ում է աշխատում: Կադրերում ակնհայտ երևում է թե ինչպես է նա ուղեցկում ՊՆ անձնակազմին:
Ավելին՝ տեսանյութում:
