«Առաջին լրատվական»-ի զրուցակիցն է քաղաքագետ Անդրիաս Ղուկասյանը:
– Պարոն Ղուկասյան, օրերս Ձեր ֆեյսբուքյան էջում բաց նամակով՝ ոչ պաշտոնական, հանդես էիք եկել Դուք և ԼՂ քաղաքացի Վարուժան Գաբրիելյանը՝ խնդրելով Բակո Սահակյանին հրաժարական չտալ: Արդյոք նրա հրաժարականի նախադրյալ կա՞:
– Ճիշտն ասած, այդ նամակը որևէ խնդրանք իր մեջ չի պարունակել, և նամակի ֆորմատը հենց այդ պատճառով է ընտրվել՝ ոչ պաշտոնական նամակ, որն ուղղված էր ո՛չ թե Բակո Սահակյան նախագահին, այլ Բակո Սահակյան ԼՂՀ քաղաքացուն: Նամակում պարզապես մեր դիրքորոշումը և կարծիքն ենք հայտնել նման քաղաքական իրավիճակում. ի՞նչ կնշանակի ԼՂ նախագահի պաշտոնը զբաղեցնող մարդու հրաժարականը:
Այս վերջին ընթացքում կան մի քանի քաղաքական ձեռքբերումներ: ԼՂ-ի դիրքորոշումը վերջին ամիսների ընթացքում էապես փոխվել է՝ ավելի համարձակ է դարձել, և ես կարծում եմ, որ բոլոր այն գործողությունները, որոնք կարող են վտանգել այդ ձեռքբերումները՝ մանավանդ հանրության մեջքի հետևում կատարվող ինչ-որ գործարքների միջոցով, բնականաբար՝ մեծագույն վնաս կհասցնեն հայ ժողովրդի անվտանգությանը և ազգային շահերին:
– Պարոն Ղուկասյան, ի՞նչ ձեռքբերումների մասին է խոսքը՝ ԼՂ կարգավորման խնդրի հե՞տ են կապված. վերջին ամիսներին շատ էին հայտարարությունները: Կասեք՝ ի՞նչ ձեռքբերումների մասին է խոսքը:
– Մինսկի խմբի համանախագահների առաջարկը, որ ամփոփված է, այսպես կոչված, «մադրիդյան սկզբունքների» մեջ, ըստ էության նշանակում է վերադարձ մինչև 1991 թվականի դեկտեմբերի 10-ը, այսինքն՝ Արցախում հանրաքվեի անցկացման ժամանակահատվածում գոյություն ունեցող կարգավիճակը: Մենք Ստեփանակերտից լսեցինք այն դիրքորոշումը, որ նման բան չի կարող լինել: Ըստ էության, Ստեփանակերտը մերժեց մադրիդյան սկզբունքները:
Երկրորդ էական փոփոխությունն այն էր, որ երկու Ազգային ժողովների համատեղ պատգամավորական խումբը դիմեց Մինսկի խմբին և մատնանշեց, որ Արցախը այսուհետ պատրաստակամ է ինքնուրույն քննարկել այդ հարցերը՝ խաղաղ կարգավորման շրջանակում, որոնք վերաբերում են իր պետական շահերին: Այսինքն՝ սա նոր երևույթ է խաղաղ կարգավորմոն գործընթացում:
Տարիներ շարունակ նման դիրքորոշում Արցախից չենք ունեցել՝ իր հստակության իմաստով, և, բնականաբար, այս իրավիճակը անհրաժեշտ է համարել ձեռքբերում և պետք է այն պահպանել:
Անդրիաս Ղուկասյանը հետ ամբողջական զրույցը՝ տեսանյութում: