Ազատամարտիկ Վոլոդյա Ավետիսյանին վեց տարի ժամկետով ազատազրկման դատապարտելով` դատարանը կայացրել է անհեթեթ և լկտի վճիռ: Հուլիսի 19-ին լրագրողների հետ հանդիպմանը նման տեսակետ հայտնեց ազատամարտիկ Գագիկ Սարուխանյանը՝ նշելով, որ դատական համակարգի աշխատակիցները և ընդհանուր դատական համակարգն անցել են բարոյականության բոլոր սահմանները:
«Մենք հասկանում ենք, որ մեր երկիրը դեռ ավտորիտար պետություն է. մեկ անձը վերևում նստած թելադրում է, բոլորը կատարում են, բայց կատարելն էլ ձև ունի, այսինքն` զրոյից մարդուն դատում են` սենց եմ ուզում, սենց էլ անում եմ: Միջնորդությամբ դիմել են տարբեր խմբակցություններից հինգ պատգամավորներ: Երբ ԱԺ հանձնաժողովի նախագահը գրում է, որ մեղքն ապացուցված չէ, ու դա ակնհայտ է, դա ոչ միայն զուտ այդ անձնավորության կարծիքն է, պրոցեսին հետևում են: Ունենալ հանդգնություն, որ վերջնական վճիռ կայացնեն, սա ես կգնահատեի իրավական բեսպրեդել, եթե ժամանակին կարող էինք ասել` իրավական անտերություն է, խախտումներ կային, անօրինություն, սա արդեն իրավական բեսպրեդել է, իրավական տեռոր: Այսինքն` կարող են ցանկացած մարդու գան, տնից առևանգեն»,- ասաց նա՝ հիշեցնելով, թե ինչպես Ավետիսյանին տարան` «տնից գողացել են, հաջորդ օրը նոր ձևակերպել, թե բերման են ենթարկել»:
Ազատամարտիկի համար անհասկանալի է, թե վեց տարվա ազատազրկումից բացի՝ ինչու նաև 2000 դոլար պահանջեցին հօգուտ պետբյուջեի: Նա կարծում է` սա պլանավորված է, հատուկ ծառայությունների գործն է, պետբյուջեից այդ գումարը հանել էին, տվել Ավետիսյանի դեմ ցուցմունք տված մարդուն, թե` կգնաս, կառաջարկես, իսկ տղային, այնուամենայնիվ, ազատել են (զորակոչից.- 1in.am)` երեք տարով, դա պարգևն էր այդ օպերացիայի մասնակցության, և չգիտես ինչու՝ Վոլոդյա Ավետիսյանը պիտի այդ պարտքը փակեր:
Սարուխանյանը շեշտեց` սկզբում քրգործը հարուցված էր որպես կաշառք. դա նշանակում է` կա մարդ, ում տալիս ես կաշառքը, մարդ, ումից վերցնում, ես և միջնորդ, հիմա վերցնողը չկա, տվողը չկա, միջնորդն ազատազրկվում է: «Երբ քննչական մարմինները հասկացան, որ կաշառքը մի քիչ թույլ ա, գործը փոխվեց, դարձավ խարդախություն: Դա առիթ էր տալիս, որ գործը վարեր իբր զինդատախազությունը: Սա Սեյրան Օհանյանի հստակ պատվերն է, բացի դրանից՝ դատարանի դահլիճում այդ զինակոչիկի (որին իբր պիտի ազատեր բանակից) տատիկը հստակ ասաց` մեր հետևից եկել էր ՊՆ համարանիշերով մեքենա, և մեզ ասացին, որ մեքենան ուղարկել է Սեյրան Օհանյանը»,- ասաց Սարուխանյանը:
Նա նշեց, որ Ավետիսյանի հետ հանդիպել են, նրան կոչ արել դադարեցնել իր ցույցերը, սակայն վերջինս խորհրդակցել է ընկերների հետ և որոշել շարունակել իր պայքարը, ինչին էլ նման արձագանք է եղել: «Բա դու նախագա՞հ ես, նվնվացող ես անվանում տղերքին, որ ճիշտ հարց են բարձրացնում: 35 հազար դրամով դու կոռնաս, ոչ թե կնվնվաս, էս տղաները նվնվացող չեն, ու էս պայքարը շարունակվելու է: Վոլոդյա Ավետիսյանի գործը որպես առանձին գործ դադարել է գործել, այն դարձել է այս ռեժիմի հեռացման անբաժանելի դրույթներից մեկը»,- ասաց նա:
Ազատամարտիկը տեղեկացրեց` իրենք շարունակելու են պայքարը, թե ինչ ձևերով` պարզ կլինի մոտակա 2-3 օրվա ընթացքում:
Ազատամարտիկ Արա Խուդավերդյանն էլ հիշեց ռուսական հայտնի խոսքը` «բիլո բի զա շտո, ուբիլ բի» (պատճառ լիներ` կսպանեի ): Նա ասաց, որ իրենք` որպես ազատամարտի մասնակիցներ, Ավետիսյանի գործին, հենց նրան սատարողներ, իրենց պահանջն օրակարգից չեն հանում: «Ես կարող եմ բացեիբաց ասել` այս ամենը կատարվում էր քինախնդրության հողի վրա»,- ասաց նա: