Հուլիսի 18-ին Ազատության հրապարակում ընդդեմ էլեկտրաէներգիայի սակագնի թանկացման հրավիրված հանրահավաքին դիմելով ներկաներին՝ նման համոզմունք հայտնեց ԱԺ ՕԵԿ խմբակցության պատգամավոր Մհեր Շահգելդյանը: «Շոգ է, սակայն պայքարող մարդուն շոգը տալիս է էներգիա՝ պայքարելուն համար էլեկտրաէներգիայի սակագնի թանկացման դեմ: Մեզ ասում են՝ սակագնի բարձրացումն անհրաժեշտ է: Ոչ, մենք դեմ ենք և համաձայն չենք, այն կախված է մի շարք ձեռնարկությունների վատ կառավարման հետ, և սովորական քաղաքացին չպետք է իր գրպանից վճարի, քանի որ մի շարք կազմակերպություններ սխալ են աշխատել: Մենք պետք է հասկանանք, որ այս թանկացումն իր հետևից բերելու է գների թանկացման, հետևաբար՝ արտագաղթի ավելացման և պետության թուլացման»,- ասաց նա:
Շահգելդյանի խոսքով՝ Ադրբեջանի անընդհատ սպառնալիքներն ու սպառազինությունների ավելացումը պահանջում են լինել ուժեղ, իսկ ուժեղ կարելի է լինել բարեկեցիկ երկրում: ՕԵԿ-ական պատգամավորը նշեց՝ ասում են «ոչ» էլեկտրաէներգիայի սակագների թանկացմանը, «ոչ» աղքատացմանը: «Ասում են՝ մեջք մեջքի որ տանք, սարեր շուռ կտանք: Եկեք՝ միասին պայքարենք մեր շահերի համար, յուրաքանչյուրի շահերի համար: Միասին՝ մենք կհասնենք հաջողության»,- ասաց նա:
Մանրամասները՝ տեսանյութում:
