Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում հուլիսի 18-ին Շանթի և ընկերների գործով դատական նիստին ամբաստանյալ Վարդան Վարդանյանը հայտարարությամբ հանդես եկավ՝ նշելով, որ ակնհայտ սուտ ցուցմունք են տալիս տուժողները, և դրա դեմ պայքարի ոչ մի միջոց չկա:
«Նախ՝ վերակենդանացման բաժին, ասենք՝ էս մարդիկ պատկերացնո՞ւմ են՝ էդ բաժինն ինչ ա: Ես չորս անգամ ծանր վիրավորվել եմ, մատ եմ կորցրել, կոկորդս ճղած, ականջիս կեսը չկա, մի ժամ վերակենդանացման բաժնում չեմ պառկել, էս մարդիկ որպես ի՞նչ են գնացել, պառկել: Ես պռոստը ուզում եմ իմանամ՝ ասենք, ուզում էին մեր վրա սպանության հոդված դնեին, թող տանեին, թաղեին, հետո ասեին՝ սպանել եք: Վերակենդանացման բաժնում պառկելս ո՞րն ա, հիվանդանոց ասեք, պրծեք, էլի, իրանք իրանց խայտառակում են»,- ասաց նա:
Վարդանյանը նաև վիրավորական համարեց տուժողի՝ նորաձև տաբատով դատարան ներկայանալը, նշեց. «Ոնց որ ճղած ջինսով եկել, կանգնել ա, ոնց որ ռոք երգիչ լինի, հեչ չի երևում, որ կամբատ ա: Էդ ես գտնում եմ, որ շատ մեծ վիրավորանք ա դատարանի նկատմամբ, թե չէ մյուս անգամ թզբեհով կգամ: Եթե էդ ձև ա, ամոթ մեր ոստիկանությանը»:
Ամբաստանյալը հակասություններ նկատեց տուժողի խոսքում, նշեց, թե նա ասում է՝ վերակենդանացման բաժնում պառկած էի, այսինքն՝ այնքան ծանր է վիճակը, որ պառկած է, բայց այնքան թեթև, որ 200 հոգի մարդ է տեսակցության գալիս, բացի այդ, ասում է՝ իրենց մինչև լույս պահել են քննչականում, հարցաքննել են, բայց չգիտես ինչու ողջ ՊՊԾ-ն գիտեր իրենց անունները:
«Ո՞նց կարա ՊՊԾ հասարակ շարքային զինվորն իմանա իմ անուն-ազգանունը, ու հաջորդ օրը սաղ մեզ ճանաչում են, սաղ մեր անունները գիտեն ու գնացել, ասել են՝ Վարդան Վարդանյանն ա եղել: Նորից եմ ասում՝ պարո՛ն դատախազ, սարքելուց մի քիչ նորմալ սարքեք»,- ասաց նա: