«Այսօր 139 ներառական դպրոցներում կրթություն են ստանում շուրջ 2700 երեխա, և այդ թիվը գնալով աճում է»,- «Առաջին լրատվական»-ի հետ զրույցում ասաց ՀՀ ԿԳՆ հանրակրթության վարչության պետ Նարինե Հովհաննիսյանը՝ հավելելով, որ հնարավորինս դյուրին է կատարվում գործընթացը, ստեղծվում է այնպիսի միջավայր, որտեղ հասկանում են՝ բոլորը մեկ միջավայրում կարող են սովորել հավասարը հավասարի պես:
Նարինե Հովհաննիսյանից հետաքրքրվեցինք՝ արդյոք գործընթացն այդքան դյուրի՞ն է, քանի որ ներառական կրթության ներդրման առաջին տարիներին հիմնական դպրոցներում սովորող աշակերտների ծնողները դեմ էին և չէին ցանկանում, որ իրենց երեխաները հաշմանդամություն ունեցող երեխաների հետ սովորեն: «Բարոյահոգեբանական առումով կարող եմ ասել՝ խնդիրը արդեն լուծված է. եթե ներառական կրթության ներդրման առաջին տարիներին որոշ ծնողների կողմից կային ընդվզումներ, ապա այսօր այդ խնդիրը չկա»,- պատասխանեց Նարինե Հովհաննիսանը:
Գործընթացը սկսվել է 2005թ.-ին, և մինչ այժմ խոսվում է տեխնիկական վերազինման անհրաժեշտության մասին, արդյոք դպրոցներում համապատասխան պայմաններ կա՞ն, գոնե թեքահարթակաների մասով՝ հարցին Ն. Հովհաննիսյանը պատասախանեց. «Այն դպրոցները, որոնք նոր են ունենում վերանորոգման ծրագրեր, քաղաքաշինության նախարարության հետ ունենք պայմանավորվածություն, որ պատրաստվեն թեքահարթակներ և ապահովվեն համապատասխան պայմաններով, անկախ նրանից՝ դպրոցը ներառակա՞ն է, թե՞ ոչ»:
Ըստ Նարինե Հովհաննիսյանի՝ մինչ ներառական դպրոց հաճախելը երեխան զննում է անցնում բժշկամանկավարժական գնահատման կենտրոնում. ներառական դպրոցներոմ չեն կարող սովորել միայն խորը մտավոր խնդիրներ ունեցող երեխաները: Այս դպրոցներում կարող են սովորել նաև թույլ լսող, թույլ տեսնող երեխաները: Նարինե Հովհաննիսյանի խոսքով՝ այս քաղաքականությունը տանում է նրան, որ բոլոր դպրոցները դառնան ներառական:
Առավել մանրամասն՝ տեսանյութում: